Inneram.com

வேலையில்லாத் திண்டாட்டமே சட்டவிரோத குடியேற்றத்துக்கு காரணம்: ஐ.நா. தகவல்

சென்னை, பிப். 9 : வேலையில்லாத் திண்டாட்டமே சட்டவிரோத குடியேற்றத்துக்கு காரணம் என்று ஐக்கிய நாடுகள் சபை தெரிவித்துள்ளது.

தமிழகத்தில் இருந்து ஐரோப்பிய நாடுகளுக்கு குறிப்பாக இங்கிலாந்துக்கு சட்டவிரோதமாக குடியேறிவர்கள் பற்றி போதை மற்றும் குற்றத் தடுப்புக்கான ஐ.நா. அமைப்பு தயாரித்துள்ள ஆய்வறிக்கையில் இத்தகவல் தெரிவிக்கப்பட்டுள்ளது. அதில் மேலும் கூறப்பட்டிருப்பதாவது:

ஜூன் 2006 முதல் ஜுன் 2007 வரை பதிவு செய்யப்பட்ட சட்டவிரோத குடியேற்றங்கள் பற்றிய 169 குற்ற ஆவணங்கள் இந்த ஆய்வுக்கு எடுத்துக் கொள்ளப்பட்டன.

சட்டவிரோதமாக வெளிநாடுகளுக்குச் சென்று திருப்பி அனுப்பப்பட்டவர்கள், அவர்களின் குடும்பத்தினர், உறவினர்கள், ஊர்க்காரர்கள், முக்கியப் பிரமுகர்கள், குடியுரிமை மற்றும் போலீஸ் அதிகாரிகள் ஆகியோரிடம் கருத்துகள் கேட்கப்பட்டன. 20-க்கும் அதிகமான ஊர்களில் இந்த ஆய்வுகள் நடத்தப்பட்டன. பத்திரிகை செய்திகளும் ஆய்வில் இதில் இடம் பெற்றன.

ஒவ்வொரு ஆண்டும் தமிழகத்திலிருந்து அதிக எண்ணிக்கையில் இளைஞர்கள் சட்டவிரோதமாக, உரிய ஆவணங்கள் இன்றி வெளிநாடுகளுக்கு குடியேற முயற்சிக்கின்றனர். இவ்வாறு செல்பவர்களில் 25 சதவீதத்தினர் ஐரோப்பிய நாடுகளுக்குச் செல்கின்றனர்.

சட்டவிரோதமாக குடியேறுபவர்களில் 90 சதவீதத்தினர் ஆண்கள். பெரும்பாலானவர்கள் கிராமப்புற விவசாயக் குடும்பங்களைச் சேர்ந்தவர்கள். 41 சதவீதத்தினர் 21 முதல் 30 வயதுக்குள்பட்டவர்கள்.

வேலையில்லாத் திண்டாட்டம் காரணமாக வெளிநாடுகளுக்குச் சென்று வசதியாக வாழலாம் என்று எண்ணுவதால் தவறான வழியை பின்பற்றுகின்றனர். இப்படி வெளிநாடுகளுக்குச் செல்பவர்கள் இதனை தவறாக கருதாமல் சமூக அந்தஸ்து உயர்வதற்கான வழியாகக் கருதுகின்றனர்.

சுமார் 35 நாடுகளில் குடியேற தமிழக இளைஞர்கள் விரும்புகின்றனர். அதில் இங்கிலாந்து முதலிடத்தில் உள்ளது. இத்தாலி, ஸ்பெயின், பிரான்ஸ் போன்ற நாடுகள் அடுத்தடுத்த இடங்களில் உள்ளன.

போலி பாஸ்போர்ட் தயாரித்தல், பாஸ்போர்ட்டின் மேல் அட்டையை மாற்றுதல், புகைப்படத்தை மாற்றுதல், போலி விசாக்கள், விமான நிலையங்களில் பயணிகளின் அனுமதி அட்டையை மாற்றுதல், போலி முத்திரைகளை தயாரித்தல் போன்ற போலி ஆவணங்கள் மூலம் ஆட்களை சட்டவிரோதமாக வெளிநாடுகளுக்கு இடைத் தரகர்கள் அனுப்புகின்றனர்.

செல்ல வேண்டிய நாடுகளுக்கு நேராகச் செல்லாமல் வேறு நாடுகளுக்குச் சென்று அங்கிருந்து செல்லும் நடைமுறை பின்பற்றப்படுகிறது என்று ஐ.நா. ஆய்வறிக்கையில் கூறப்பட்டுள்ளது.

அங்கன்வாடி மையம் மூடல்: குழந்தைகள் பாதிப்பு

பரமக்குடி, பிப். 9: பரமக்குடி அருகே, வேந்தோணி கிராமத்தில் உள்ள அங்கன்வாடி மையம் தொடர்ந்து மூடப்பட்டுள்ளதால், குழந்தைகள் பாதிக்கப்பட்டுள்ளனர் என கிராமத் தலைவர் நாகேந்திரன் தெரிவித்தார்.

வேந்தோணி அங்கன்வாடி மையத்தில் பணியாளர் மற்றும் உதவியாளர் என இருவர் வேலைபார்த்து வந்தனர். இதில், பணியாளர் நாகேஸ்வரி 2 மாத விடுப்பில் சென்றுவிட்டார். உதவியாளர் குழந்தைகளைக் கவனித்து வந்தார்.

இந் நிலையில், இங்கு பணியாற்றிவந்த உதவியாளரை பரமக்குடி குழந்தைகள் வளர்ச்சித் திட்ட அலுவலர் காமராஜர் நகர் பகுதிக்கு மாற்றிவிட்டார். இதனால், குழந்தைகளுக்கு தொடர்ந்து சத்துணவு மற்றும் ஊட்டச்சத்து வழங்க முடியாமல் அங்கன்வாடி மையம் மூடப்பட்டுவிட்டது.

இதனால், குழந்தைகள் பெரும் பாதிப்புக்குள்ளாகி உள்ளனர். இதுகுறித்து, மாவட்ட நிர்வாகம் உடனே நடவடிக்கை எடுக்க வேண்டும் என அவர் கேட்டுக் கொண்டுள்ளார்.

இந்திய-இலங்கை அணிகள் மோதும் முதல் 20-20 கிரிக்கெட் போட்டி கொழும்பு நகரில் இன்று இரவு ஏழுமணிக்குத் தொடங்கி நடக்க இருக்கிறது.

நடந்து முடிந்த ஒரு நாள் தொடரை 4-1 என்ற கணக்கில் கைப்பற்றிய மகிழ்வில் இந்திய அணியும் கடந்த ஒருநாள் போட்டியில் வென்ற தெம்பில் இலங்கையும் களம் இறங்குகின்றன.

இந்தியாவின் நட்சத்திர பந்துவீச்சாளர் ஜாஹிர்கான் இருஆட்டங்களுக்கு ஓய்வு எடுத்துவிட்டு இன்று அணிக்குத் திரும்புகிறார். ஒருநாள் போட்டி முடிந்ததும் சச்சின் நாடு திரும்பிவிட்டார். 20-20 போட்டியில் சிறப்பு பெற்ற சேவாக், தோனி, யுவராஜ், யூசுஃப் பதான், ரெய்னா ஆகியோர் இந்திய அணியை அலங்கரிக்க, இலங்கையிலோ நட்சத்திர ஆட்டக்காரர்களான சங்கக்காரா, கேப்டன் ஜெயவர்த்தனே ஆகியோருக்கு ஓய்வு அளிக்கப்பட்டுள்ளது. எனினும், மற்றொரு சிறப்பு மட்டையாளரான ஜெயசூர்யா அணியில் உள்ளார்.

அதுபோல, பந்துவீச்சிலும் முரளிதரன், மெண்டிஸ் ஆகியோர் இலங்கை அணியில் இடம்பெறாதது வியப்பை ஏற்படுத்தியுள்ளது.

பஜாஜ் நிறுவனம், பஜாஜ் XCD-135 DTS SI என்கிற புதிய மோட்டார் பைக்கை அறிமுகப்படுத்தியுள்ளது.

மிகுந்த ஸ்டைல் மற்றும் செயல்திறனுடன் இளைஞர்களைக் கவரும் வகையில் வடிவமைக்கப்பட்டுள்ள இந்த பைக் ஐந்து வண்ணங்களில் கிடைக்கிறது. இதில் டிஸ்க் பிரேக், ஐவேக கியர் பாக்ஸ், ஆட்டோ ச்சோக், இரண்டு பைலட் விளக்குகள் முதலிய அம்சங்கள் உள்ளன.

பஜாஜ் மண்டல மேலாளர் மனோஜ் குமார் நிருபர்களிடம் தெரிவிக்கையில் 'பஜாஜ் நிறுவனத்தின் மதிப்புமிக்க பைக்குகளில் இது முதலிடத்தில் உள்ளது' என்றார். மும்பையில் இதன்விலை ரூ.47,000/- ஆக கணிக்கப்பட்டுள்ளது.

CBI எனப்படும் மத்தியப் புலனாய்வுத்துறை, மத்திய அரசுக்கும் அதன் சட்ட அமைச்சகத்துக்கும் கீழ்படியாமல் சுதந்திரமாக செயல்பட வேண்டும் என்று உச்சநீதிமன்றம் கண்டன அறிவுறுத்தல் செய்துள்ளது.

உத்திரபிரதேச சமாஜ்வாதி கட்சித்தலைவர் முலாயம் சிங் யாதவ் சொத்துகுவிப்பு குறித்து விஸ்வநாத் சதுர்வேதி என்ற வழக்கறிஞர் தொடுத்த வழக்கில் நீதிபதிகள் அல்மாஸ் கபீர், சிரியாக் ஜோசப் அடங்கிய அமர்வு இவ்வாறு தெரிவித்துள்ளது. "எந்த வழக்கிலும் கடைசி நேரத்தில் வழக்கறிஞர்களை மாற்றும் போக்கை ம.பு.து கைவிடவேண்டும்" என்றனர் நீதிபதிகள்.

முன்னதாக, தன்மீது காங்கிரஸ் ஆதரவாளர் ஒருவரால் தொடுக்கப்பட்டுள்ள இவ்வழக்கு புனையப்பட்டது என்ற முலாயம்சிங் தரப்பு வாதத்தையும் நீதிபதிகள் தள்ளுபடி செய்தனர்.

சமாஜ்வாதி பொதுச்செயலாளர் அமர்சிங் இது குறித்து கருத்தளிக்கையில் தனக்கு மத்திய புலனாய்வு துறை மீது சற்றும் நம்பிக்கை இல்லை என்றும், அது எப்போதும் நடுவண் அரசின் கைப்பாவையாகவே விளங்குவதாகவும் தெரிவித்துள்ளார்.

விசாரணை செய்யும் வேளையில் எஃப்.பி.ஐ ஐச் சேர்ந்த பெண் அதிகாரி தன்னை மானபங்கம் செய்து கொடுமைபடுத்தியதாக, மும்பை தாக்குதல் வழக்கில் குற்றவாளிகள் பட்டியலில் இணைக்கப்பட்டுள்ள பகிம் அன்சாரி புகார் கூறியுள்ளார். தனது வழக்கறிஞர் வழியாக மும்பை மெட்ரோ நீதிமன்றத்தில் அவர் தாக்கல் செய்த புகாரைத் தொடர்ந்து, நீதிமன்றம் க்ரைம் பிராஞ்சிற்கு நோட்டீஸ் அனுப்பியுள்ளது. இம்மாதம் 26 ஆம் தேதிக்குள் பதிலளிக்க வேண்டும் எனவும் கட்டளையிட்டுள்ளது.

விசாரணைக்கிடையில் தாக்கியதன் காரணமாக உடம்பில் மோசமான காயங்கள் ஏற்பட்டுள்ளதாகவும் பகீமை மருத்துவ பரிசோதனைக்கு உட்படுத்த உத்தரவிட வேண்டும் எனவும் பகீம் கொடுத்த புகாரில் கோரிக்கை விடுக்கப்பட்டுள்ளது.

விசாரணை செய்த மூன்று எஃப்.பி.ஐ அதிகாரிகளில் பெண் அதிகாரி மானபங்கப்படுத்தியதாகவும் புகாரில் தெரிவிக்கப்பட்டுள்ளது. தன்னை விசாரணை நடத்த எஃப்.பி.ஐக்கு அனுமதி வழங்கிய மாநகர காவல்துறை மீது நடவடிக்கை எடுக்க வேண்டும் எனவும் அவர் தனது புகாரில் தெரிவித்துள்ளார்.

இந்திய சட்டப்படி, நாட்டில் குற்றம் சுமத்தப்பட்ட ஒருவரை வெளிநாட்டு ஏஜன்ஸிகள் விசாரணை செய்ய அனுமதி இல்லை, எனவே அவருக்கு நஷ்டஈடு வழங்கவேண்டும் எனவும் பகீமின் வழக்கறிஞர் நக்வி கூறினார்.

இந்தியா பாகிஸ்தான் மீது தாக்குதல் நடத்தும் எனில் மும்பையைப் போன்ற தாக்குதல்கள் இந்தியாவில் மேலும் நிகழும் என அல்கைதா மிரட்டல் விடுத்துள்ளது.

பாகிஸ்தானை இந்தியா தாக்கும் எனில் மிகப் பெரிய அழிவை இந்தியா எதிர்கொள்ள வேண்டியிருக்கும் என ஆப்கானிஸ்தானிலுள்ள அல்கைதா தலைவர் முஸ்தஃபா அபு அல்யாஸி அறிவித்துள்ளார்.

சுமார் 20 நிமிட நேரம் ஓடும் இவரின் பேச்சடங்கிய வீடியோவை பி.பி.ஸி வெளியிட்டுள்ளது.

ஒரிசாவில் சுமார் 40 ஆயிரம் ஹவில்தார், கான்ஸ்டபிள் மற்றும் சிப்பாய் பொறுப்புகளில் உள்ள காவலர்கள் பொது வேலை நிறுத்தத்தில் ஈடுபடப் போவதாய் அச்சுறுத்தி உள்ளனர்.

முதல்வர் கருணாநிதி முதுகில் ஏற்பட்ட தசை பிடிப்பு காரணமாக 15 நாட்களுக்கும் மேலாக போரூர் ராமச்சந்திரா மருத்துவமனையில் சேர்க்கப்பட்டு சிகிச்சை பெற்று வந்த நிலையில், வலி குறையாத காரணத்தினால் எம்.ஆர்.ஐ.ஸ்கேன் எடுக்கப்பட்டு, அவரது தண்டுவடத்தில் ஏற்பட்டுள்ள வலியை சரி செய்வதற்கு அறுவை சிகிச்சை செய்வதென்ற முடிவுக்கு டாக்டர்கள் வந்துள்ளார்கள்.

2 நாட்களுக்கு முன்பு டெல்லியில் இருந்து வந்த டாக்டர் ஏ.ஜெய்ஸ்வாலும், மற்ற டாக்டர்களும் கலந்து பேசி அறுவை சிகிச்சை செய்வதென்ற முடிவுக்கு வந்துள்ளனர்.

இந்த அறுவை சிகிச்சை 11ம் தேதி புதன்கிழமையன்று நடைபெற உள்ளது. முதல்-அமைச்சர் கருணாநிதியின் நலனை கவனிக்க பின்வரும் டாக்டர்களைக் கொண்ட குழு ஒன்றும் அமைக்கப்பட்டு உள்ளது.

எலும்பு சிகிச்சை நிபுணர் டாக்டர் எஸ்.எஸ்.கே.மார்த்தாண்டம் இக்குழுவுக்குத் தலைமை வகிப்பார். டாக்டர் ஏ.ஜெய்ஸ்வால், டாக்டர் மயில்வாகனன், டாக்டர் கார்த்திக் கைலாஷ், டாக்டர் எஸ்.தணிகாசலம், டாக்டர் ஐ.எஸ்.நாயுடு, டாக்டர் மகேஷ் வகாமுடி, டாக்டர் பாஸ்கர், டாக்டர் பி.எஸ்.சண்முகம், டாக்டர் ராஜ் பி.சிங், டாக்டர் ஏ.வி.சீனிவாசன், டாக்டர் சவுந்தரராசன், டாக்டர் கே.ஆர்.பழனிசாமி, முதல்வரின் தனி டாக்டரான டாக்டர் பி.கோபால் ஆகியோரும் குழுவி்ல் இடம் பெற்றுள்ளனர்.

அறுவை சிகிச்சைக்கு பிறகு முதல்-அமைச்சர் கருணாநிதி விரைவில் நலம் பெற்றிடும் வகையில் பார்வையாளர்கள் கண்டிப்பாக ஒத்துழைக்குமாறு கேட்டுக்கொள்ளப்படுகிறார்கள் என்று கூறப்பட்டுள்ளது.

சத்யம் ஆன்லைன் தளமாக இருந்து பிராந்திய மொழிகளில் வளர்ச்சி கண்டு சிஃபி டாட் காம் என்று பெயர் பெற்ற இணைய நிறுவனம் தன் பிராந்திய மொழிச்சேவைகளை நிறுத்திக்கொண்டுள்ளது.

தமிழ், தெலுங்கு மலையாளம், ஹிந்தி, கன்னடம் ஆகிய அனைத்து மொழிச்சேவைகளும் மூடப்பட்டதற்கு 'செலவு குறைப்பு நடவடிக்கை' என்று காரணம் சொல்லப்படுகிறது.

2000 ஆம் ஆண்டில் தொடங்கப்பட்ட தமிழ்ச்சேவை 9 ஆண்டுகளில் முடிவு கண்டுள்ளது.

தமிழகத்தில் அரிசி விலை கடுமையாக உயர்ந்து வருகிறது.
மூட்டைக்கு ரூ.400 வரை விலை உயர்ந்துள்ளது.
ஓரிரு மாதங்களுக்கு முன் நிஷா புயல் வந்து போனதால் நெல் விளைச்சல் தமிழகத்தில் பாதிக்கப்பட்டது. நெற்களஞ்சியங்களான தஞ்சை, திருவாரூர், கடலூர் மாவட்டங்களில் விளைச்சல் கடுமையாகப் பாதிக்கப்பட்டுள்ளது. கடந்த ஆண்டுடன் ஒப்பிடுகையில் 30 சதவீத விளைச்சல் குறைவு காணப்படுகிறது.

மேலும், கர்நாடக மாநிலத்திலிருந்து பிறமாநிலங்களுக்கு அரிசி அனுப்புவது முற்றிலும் தடை செய்யப்பட்டுள்ளது. ஆந்திர அரிசி வரத்தும் முழுவதுமாக நின்று போனது. இவ்விரு மாநிலங்களே தமிழகத்தின் அரிசி தேவையில் பாதியளவு பூர்த்தி செய்து வந்தன.

வட மாநிலங்களிலிருந்து வரவழைக்கப்படும் நெல்லுக்கும் சரக்குக்கட்டண உயர்வால் அடக்கவிலை அதிகமாகிவிடுகிறது. இந்நிலை நீடித்தால், அடுத்தடுத்த மாதங்களில் அரிசி கிலோ ரூ.50/=க்கு விற்றாலும் ஆச்சர்யமில்லை என்று அரிசிக்கடை அதிபர் ஒருவர் தெரிவித்தார்.

ஓய்வூதியத்தில் அதிருப்தி: விருதுகளை திருப்பி அளித்தனர், முன்னாள் ராணுவத்தினர்

புதுடெல்லி, பிப்.9-

ஆறாவது சம்பள கமிஷனில் மத்திய அரசு ஊழியர்களுக்கும் ராணுவத்தினருக்கும் புதிய சம்பளம் மற்றும் ஓய்வு பெற்ற ராணுவத்தினருக்கு ஓய்வூதியம் ஆகியவற்றை உயர்த்தி பரிந்துரை செய்தது. அதன்படி, ஓய்வு பெற்று பல ஆண்டுகள் ஆன வீரர்களுக்கு குறைவாகவும் அதன் பிறகு உள்ளவர்களுக்கு சற்று அதிகமாகவும் ஓய்வூதியம் பரிந்துரை செய்யப்பட்டது.

இதனால், முன்னாள் ராணுவத்தினர் அதிருப்தி அடைந்தனர். `ஒரே பதவி, ஒரே சம்பளம்` என்று வலியுறுத்தி கடந்த டிசம்பர் மாதம் தொடர் உண்ணாவிரதம் நடத்தினர். எனினும் அவர்களது கோரிக்கை ஏற்கப்படவில்லை. இதையடுத்து, பணியில் இருந்தபோது அளிக்கப்பட்ட வீர தீர செயல்களுக்கான விருதுகளை திருப்பி அளிக்க முடிவு செய்தனர்.
அதன்படி, டெல்லி ஜந்தர் மந்தரில் நேற்று கூடி தங்களுடைய விருதுகளை ஒன்றாக சேர்த்தனர். பின்னர் ஜனாதிபதி மாளிகைக்கு சென்று அங்குள்ள அதிகாரிகளிடம் அந்த விருதுகளை ஒப்படைத்தனர். இதில் 300-க்கும் மேற்பட்டோர் கலந்து கொண்டனர். இது தவிர, 10 ஆயிரம் அதிகாரிகள் மற்றும் வீரர்கள் இந்த போராட்டத்தில் ஈடுபட இருப்பதாக முன்னாள் ராணுவத்தினர் சங்க துணை தலைவர் சத்பிர் சிங் தெரிவித்தார்.

ஆஸ்திரேலியாவின் விக்டோரியா மாநிலத் தலைநகர் மெல்போர்னை ஒட்டியுள்ள பகுதிகளில் கடும் காட்டுத்தீ பரவி கடும் நாசத்தை ஏர்படுத்தி வரும் செய்தியை முன்னர் பதிந்திருந்தோம். தற்போது இக்காட்டுத்தீ மேலும் பரவி 170 உயிர்களை இதுவரை பலி கொண்டுள்ளது. சாவு எண்ணிக்கை மேலும் அதிகரிக்கக் கூடும் என அரசு அலுவலர்கள் அச்சம் தெரிவித்துள்ளனர்.

காட்டுத்தீயிலிருந்து தப்பிக்கக் கார்களில் ஏறிப் புறப்பட முயன்ற போது காரிலிருந்தவாறே எரிந்து தீயில் கருகிப் பலர் இறந்துள்ளது தற்போது தெரிய வந்துள்ளது.

ஆஸ்திரேலிய வரலாற்றில் மிகக் கடுமையான இயற்கைப் பேரழிவாக இதைக் கருதுவதாக ஆஸ்திரேலியப் பிரதமர் கெவின் ரட் தெரிவித்துள்ளார்.

பீகாரில் மாவோவாதிகளின் செல்வாக்கு அதிகமுள்ள பாட்னாவுக்கு அருகிலுள்ள பகுதியில் 100க்கு மேற்பட்டோர் இணைந்து காவல்நிலையம் மீது நடத்திய தாக்குதலில் 6 போலீசார் கொல்லப்பட்டனர். பாட்னாவிலிருந்து 80 கிலோமீட்டருக்கு அப்பால் உள்ள ஒரு கிராமத்தில் இச்சம்பவம் நடந்துள்ளது. இதே பகுதியில் கடந்த வாரம் மாவோவாதிகளின் துப்பாக்கி சூடில் 15 போலீசார் கொல்லப்பட்டிருந்தனர் என்பது குறிப்பிடத்தக்கது.

மணிக்கு 120 கிமீ வரை வேகத்தில் கடும் புயல் காற்று வீசக்கூடும் என்ற அச்சத்தால் பாரிஸ் நகர விமான நிலையங்கள் 12 மணிநேரத்துக்கு மூடப்பட்டுள்ளன.

இதற்கு முன் கடந்த ஜனவரி 14 அன்று கடும் புயல் வீசி 11 பேரைப் பலி கொண்டதுடன் பாரிஸ் நகரமெங்கும் கடும் சேதத்தை ஏற்படுத்தியது நினைவிருக்கலாம்.

தற்பொழுது மணிக்கு 120 கிமீ வேகத்தில் காற்று வீசக்கூடும் என வானிலை ஆய்வு மையங்கள் எச்சரிக்கை விடுத்திருப்பதால் ஐரோப்பாவின் மிக முக்கிய விமான நிலையங்களில் ஒன்றான சார்லஸ் டி கால் விமான நிலையம் உள்பட பாரிசின் இன்னொரு விமான நிலையமான ஆர்லி விமான நிலையமும் முன்னெச்சரிக்கை நடவடிக்கையாக உள்ளூர் நேரம் இரவு 8 மணிமுதல் 12 மணிநேர அளவிற்கு மூடப்படும் என அறிவிக்கப்பட்டுள்ளது.

சமாஜ்வாதி கட்சியின் பொதுச் செயலாளர் அமர்சிங் கிளின்டனின் நல அமைப்புக்கு கருப்புப் பணத்தை ஹவாலா பரிவர்த்தனை மூலம் நன்கொடையாக அளித்தார் என்று தேர்தல் ஆணையத்திடம் இன்று புகார் அளிக்கப் பட்டுள்ளது.

மும்பையில் கடந்த ஆண்டு நவம்பர் 26 அன்று நடைபெற்ற தீவிரவாதத் தாக்குதல் தொடர்பாக இந்தியா மற்றும் பாகிஸ்தான் இடையே ஏற்பட்டுள்ள பிரச்சனையில் காமன்வெல்த் அமைப்புத் தலையிடாது என்று கூறப்படுகிறது.

2002 ஆம் ஆண்டு கோத்ராவில் நடைபெற்ற கலவர வழக்கில் கைது செய்யப்பட்ட வல்சாத் காவல்துறை துணை கண்கானிப்பாளர் கே.ஜி. எர்தாவிடம் விசாரணை செய்வதற்காக 5 நாட்கள் சிறப்பு விசாரணைக் குழுவின் (SIT) கட்டுப்பாட்டில் எடுத்துக்கொள்ள நீதிமன்றம் அனுமதி அளித்துள்ளது.

பொது மக்களுக்கு எதிராக அதிகமதிகம் வன்முறைகள் நடைபெறும் நாடுகளின் பட்டியலில் இலங்கை முதலிடத்தைப் பெற்றுள்ளது

பெல்ஜியம் தலைநகர் ப்ரெசெல்ஸில் 'உலக வன்முறைகள் கண்காணிப்பு மையம்' அமைப்பு உள்ளது. அந்த அமைப்பு வெளியிட்டுள்ள அறிக்கை :


இலங்கையின் வடபகுதியில் அந்நாட்டுப் படையினர் மேற்கொண்டுள்ள ராணுவ தாக்குதலில் பல அப்பாவிப் பொதுமக்கள் தினமும் கொல்லப்படுவதுடன், இவ்வாறு பாதிக்கப்பட்ட அல்லது காயமடைந்த பொதுமக்களுக்கு உதவக்கூடிய பொது உதவி நிறுவனங்களுக்கும், ராணுவ தாக்குதல்கள் சேதம் விளைவித்து வருகின்றன.

விடுதலைப்புலிகளுக்கு எதிரான ராணுவ தாக்குதல்களில் வெற்றியடைந்து வருவதாக இலங்கை அரசு கூறி வரும் போதிலும், ஏராளமான பொதுமக்கள் கடந்த ஜனவரி மாதத்தில் கொல்லப்பட்டுள்ளனர். தற்போதைய நிலைமை அதைவிட மோசமடைந்துள்ளது.

உலகில் தற்போது நடைபெற்று வரும் மிக மோசமான போர் தாக்குதல்களில் மிக அதிகமான பொதுமக்கள் பாதிக்கப்படும் இடமாக ஸ்ரீலங்காவின் வடபகுதி காணப்படுகிறது.அந்த வகையில் இப்பட்டியலில் இலங்கை முதலிடம் பிடித்துள்ளது.

இஸ்ரேல் படையினரின் தாக்குதலால் பாதிப்படைந்த பாலஸ்தீனத்தின் காஸா பகுதி, அரசுக்கு எதிரான மக்கள் எதிர்ப்புகள் தீவிரமடைந்துள்ள மெடகாஸ்கர், அரசு படைகளுக்கு எதிராகப் போர் புரியும் மாலி நாட்டின் ரோறக் போராளிகளின் போர்ப் பகுதி போன்றவையும் உலகில் வன்முறை அதிக நிகழும் நாடுகளின் பட்டியலில் இடம்பெற்றுள்ளது

தமிழக அரசின் நடப்பாண்டுக்கான நிதிநிலை அறிக்கை இம்மாதம் 17ம்தேதி தாக்கல் செய்யப்படுகிறது.

வரும் 17ம் தேதி தமிழக சட்டசபையின் கூட்டத்தொடர் தொடங்குகிறது. அன்று காலை 9.30 மணிக்கு 2009 -2010ம் ஆண்டுக்கான நிதிநிலை அறிக்கையை நிதி அமைச்சர் க.அன்பழகன் தாக்கல் செய்கிறார்.

அத்துடன் அன்றைய சட்டசபை நிகழ்ச்சிகள் ஒத்திவைக்கப்படும். பின்னர், சபாநாயகர் அறையில் அலுவல் ஆய்வு குழு கூடி கூட்டத் தொடரை எத்தனை நாளைக்கு நடத்துவது என்று முடிவெடுக்கப்படும்.

மறுநாள் நிதிநிலை அறிக்கை மீது விவாதம் நடைபெறும். 5 நாட்கள் இந்த விவாதம் நடைபெறும் என்று தெரிகிறது. இதை தொடர்ந்து ஒவ்வொரு நாளும் துறைவாரியாக மானிய கோரிக்கைகள் தாக்கல் செய்யப்பட உள்ளது.

வங்கதேச கடல்பரப்பில் அமெரிக்க இராணுவ தளம் அமைக்கப்படவில்லை என அமெரிக்கா கூறியுள்ளது.

கடல் வழியாக தீவிரவாதிகள் நாட்டினுள் நுழைவதைத் தடுக்கும் வகையில் கடலோரப் பாதுகாப்பு தீவிரப்படுத்தப்படும் என்று உள்துறை அமைச்சர் ப.சிதம்பரம் தெரிவித்துள்ளார்.

உள்ளூர் காவல்துறை, கப்பற்படை, கடலோர காவல்துறை மூன்றும் இணைந்த கமாண்டோ படை ஒன்று உருவாக்கப்படும் என்ற ப.சிதம்பரம், இப்பாதுகாப்பை பலப்படுத்த உள்ளூர் மீனவர்கள் ஒத்துழைப்பு நல்க வேண்டும் என்றும் கேட்டுக்கொண்டுள்ளார்

விழுப்புரம் மாவட்டத்தைச் சேர்ந்தவர் சைமன். ஆப்கானிஸ்தானில் ஹெராட் என்னும் மாகாணத்தில் இராணுவ விமான தளம் ஒன்றில் இத்தாலிய இராணுவ வீரர்களுக்கான உணவுப்பொருள் விற்பனை அங்காடியில் வேலைபார்த்து வந்தார்.

பணியிலிருந்த போது அவரை தாலிபான் தீவிரவாதிகள் கடத்திச் சென்றனர்.
இந்நிலையில் தங்கள் கோரிக்கை ஏற்கப்படாததால், தீவிரவாதிகள் அவரைக் கொன்று விட்டதாக செய்திகள் தெரிவிக்கின்றன. செய்தியறிந்த சைமன் குடும்பத்தினர் பெரும் துயரத்தில் மூழ்கியுள்ளனர்.

தமிழக தலைமை ச்செயலகம் முன்பு பார்வையற்ற இடைநிலை பயிற்சி ஆசிரியர்கள் 50 பேர் இன்று ஆர்ப்பாட்டம் நடத்தினர். பயிற்சி முடித்து பல ஆண்டுகளாகியும் அரசு வேலைவாய்ப்பு வழங்கப்படாததை க் கண்டித்தும், நிரப்பப்படவுள்ள பணியிடங்களில் நியாயமான ஒதுக்கீடு வழங்கக் கோரியும் இந்த ஆர்ப்பாட்டம் நடைபெற்றது. இதனால் தலைமைச் செயலகத்தில் பரபரப்பு காணப்பட்டது.

அனுமதிபெறாத ஆர்ப்பாட்டம் என்பதால் அவர்களை காவல்துறை கைது செய்தது.

பெரும் விமான விபத்து தவிர்க்கப்பட்டதால் 150 பேர் உயிர் தப்பியுள்ளனர்.

மும்பையிலிருந்து டெல்லி செல்ல இருந்த இந்தியன் ஏர்லைன்ஸ் விமானம் IC866 புறப்பட இருந்த ஓடுபாதையில், குடியரசுத்தலைவர் பிரதீபா பாட்டீலுக்கான பாதுகாப்பு ஹெலிகாப்டர் ஒன்றும் இறங்க அனுமதிக்கப்பட்டதால் இந்த விபத்து நேரிட இருந்தது.
நல்லவேளையாக, விமானி ஹெலிகாப்டர் இறங்குவதை கவனித்துவிட்டதால், இந்த பெரும்விபத்து தவிர்க்கப்பட்டு 150 பயணிகள் உயிர்மீண்டனர்.

மும்பையில் நிகழ்ச்சி ஒன்றில் கலந்துகொள்வதை முன்னிட்டு பிரதீபா பாட்டில் வருகைத் தருவதையொட்டி அவருக்கான பாதுகாப்பு ஹெலிகாப்டர்கள் மூன்று மும்பைக்கு வரவழைக்கப்பட்டிருந்தன. அவற்றுள் ஒன்றே மேற்படி செய்தியில் இடம்பெற்றது.

இந்நிகழ்வால் மும்பை விமான நிலையம் பரபரப்புடன் காணப்படுகிறது. ஒரே ஓடுபாதையில் இரு வானூர்திகளை அனுமதித்தது குறித்த விசாரணைக்கு முதல்வர் விலாஸ்ராவ் தேஷ்முக் உத்தரவிட்டுள்ளார்.

மலேசியாவைச் சேர்ந்த இரட்டையர் ஒருவரைப் போலவே இன்னொருவர் இருந்ததால் மரண தண்டனையிலிருந்து தப்பினர்.

மலேசியாவைச் சேர்ந்த சதீஷ் ராஜ், சபரீஷ் ராஜ் என்ற இருவரும் இரட்டையர்கள். இருவரும் அச்சு அசலாக ஒருவரைப் போல் இன்னொருவர் இருப்பர். 2003-ஆம் ஆண்டு இவர்களில் ஒருவர் 166 கிலோ கஞ்சாவையும் 2 கிலோ ஓப்பியம் போதைமருந்தையும் வைத்திருந்த போது பிடிபட்டார்.

இரட்டையரில் இன்னொருவரும் குற்றம் நிகழ்ந்த இடத்திலேயே கைது செய்யப்பட்டடதும், அரசு தரப்பு வழக்குரைஞர்கள் இரட்டையரில் எவர் குற்றம் செய்தவர் என நிரூபிக்க இயலவில்லை. மரபணு சோதனைகள் மூலமும் குற்றம் இழைத்தவர் இன்னார் தான் எனத் தெளிவாக நிரூபிக்க இயலவில்லை.

போதை மருந்துகள் கடத்தலுக்கு மலேசிய சட்டப்படி மரண தண்டனை விதிக்கப்படும். இருப்பினும் சதீஷ், சபரீஷ் இரட்டையரில் குற்றம் இழைத்தவர் இன்னார் எனத் தெளிவாக நிரூபிக்கப்படாததால், அநியாயமாக ஒரு நிரபராதி தண்டிக்கப்படக் கூடாது என்பதால் இருவரையும் விடுதலை செய்து உத்தரவிடுவதாக நீதிபதி தீர்ப்பு வழங்கினார்.

பாதுகாப்பு பகுதிகள் என வரையறை செய்யப் பட்ட சுதந்திரபுரம், இருட்டுமாடு, உடையார்காடு, தேவிபுரம் ஆகிய இடங்களிலும் இலங்கை இராணுவம் தாக்குதல் நடத்தி வருகிறது. வெள்ளி மற்றும் சனிக்கிழமை ஆகிய இரண்டு நாள்களில் மட்டும் சுமார் 120 பொதுமக்கள் இந்தப் பகுதியில் இலங்கை இராணுவத்தால் கொல்லப் பட்டுள்ளனர்.

விஞ்ஞானிகள் அடங்கிய குழுவொன்றை ஏற்படுத்தி கடல்நீரை குடிநீராக மாற்றும் அதிக செலவற்ற தொழில்நுட்பத்தை கண்டறிய அரசு முயல வேண்டும் என்று உச்சநீதிமன்றம் கருத்து தெரிவித்துள்ளது. தண்ணீர் பிரசினை தீர்க்கப்படாவிட்டால் சமூகத்தில் அமைதியின்மை நிலவும் என்று கவலையும் தெரிவித்துள்ளது.

வழக்கு ஒன்றின் தொடர்பாக கருத்து தெரிவித்த உச்சநீதிமன்ற நீதிபதிகள் மார்க்கண்டேய கட்ஜு, அல்தாமஸ் கபீர் ஆகியோர் அடங்கிய குழு

"நாட்டில் தண்ணீர் பிரசினையை தீர்க்கவேண்டியது மிகவும் இன்றியமையாதது. சிறந்த விஞ்ஞானிகள் அடங்கிய குழு ஒன்றை மத்திய அரசு ஏற்படுத்த வேண்டும். நிர்வாகரீதியாக நிதி மற்றும் தொழில்நுட்ப உதவிகளை மாநில அரசுகள் செய்து தரவேண்டும். நாட்டின் குடிநீர் பிரசினையைத் தீர்க்க கடல்நீரை குடிநீராக மாற்றும் செலவற்ற தொழில்நுட்பத்தை கண்டறிய அவர்களை கேட்டுக்கொள்ள வேண்டும். வெளிநாட்டு வாழ் இந்திய விஞ்ஞானிகள், வெளிநாட்டு நிபுணர்களின் உதவியையும் தேவைக்கேற்ப பெறலாம். தண்ணீர் பிரசினையால் மாநிலங்களுக்கிடையேயும் மோதல்கள் ஏற்படுவதால் ஒருநாள் கூட தாமதமின்றி அரசு இதில் முனைப்பு காட்ட வேண்டும்"

என்று கூறியுள்ளனர்.

மெர்போர்ன் நகருக்கு அருகில் கடும் சூட்டின் காரணமாகப் படர்ந்தக் காட்டுத்தீயில் சுமார் 100 க்கும் அதிகமானோர் உயிரிழந்துள்ளனர். நூற்றுகணக்கானோர் படுகாயமடைந்துள்ளனர்.

நேற்று மெல்போர்ன் நகரில் உச்சபட்சமாக 46.7 டிகிரி வெப்பம் பதிவாகியிருந்தது. கடும் வெப்பத்தின் காரணமாக இரண்டாயிரம் சதுர கிலோமீட்டருக்கும் அதிகமாக காட்டுத்தீ பரவியுள்ளது. இதனால் கடும் நாசம் விளைந்துள்ளது. பல கிராமங்கள் முழுமையாக தீக்கு இரையாகியுள்ளன. உயிரிழந்தோரின் எண்ணிக்கை மேலும் அதிகமாகும் என அஞ்சப்படுகிறது.

வெப்பக்காலத்தில் ஆஸ்திரேலியாவில் காட்டுத்தீ பரவுவது ஆண்டுதோறும் நடக்கும் ஒரு சம்பமாகும். இவ்வாண்டு தாக்கிய மிக அதிகபட்ச வெப்பமே இதற்குக் காரணம் எனக் கூறப்படுகிறது. தீயணைப்புத் துறையினர் மிகுந்த சிரமங்களுக்கு இடையே தீயை கட்டுப்படுத்த முயற்சிகள் மேற்கொண்டு வருகின்றனர்.

2002 ல் குஜராத் மாநிலத்தில் நடந்த கலவரம் தொடர்பான வழக்கில் மாநில உயர் போலீஸ் அதிகாரியான டி.எஸ்.பி கெ.ஜி. எர்தாவை எஸ்.ஐ.டி கைது செய்தது. உச்சநீதிமன்றத்தின் கட்டளைபடி விசாரணையை ஏற்று நடத்திய எஸ்.ஐ.டி, நேற்று டி.எஸ்.பி எர்தாவைக் கைது செய்ததாக தெரிகிறது.

குஜராத் கலவரத்திற்கிடையில் முன்னாள் காங்கிரஸ் எம்.பி. இக்ஸான் ஜப்ரி உட்பட 35 பேரைக் கொலை செய்யப்பட்ட குல்பர்கா சொஸைட்டி கொலை வழக்கு தொடர்பாக எர்தா கைது செய்யப்பட்டுள்ளார். கலவர வேளையில் மெஹானி நகர் காவல்நிலையத்தில் எர்தா பணியாற்றியிருந்ததாக எஸ்.ஐ.டி தலைவரும் முன்னாள் சிபிஐ டைரக்டருமான ஆர்.கெ.ராகவன் தெரிவித்தார்.

தற்போது கைது செய்யப்பட்டுள்ள டி.எஸ்.பி எர்தாவே முன்னர் இதே குல்பர்கா வழக்கை விசாரிக்கும் பொறுப்பில் இருந்தார். இவ்வழக்கு தொடர்பாக இவரைச் சமீபத்தில் எஸ்.ஐ.டி விசாரணை நடத்தியிருந்தது. தற்பொழுது பணியிலிருக்கும் வல்ஸத் மாவட்டத்திலிருந்து அவர் கைது செய்யப்பட்டுள்ளார்.

குல்பர்கா வழக்கு தொடர்பாக நீதிமன்றத்தில் 2000 பக்கம் கொண்ட குற்றப்பத்திரிக்கையை எஸ்.ஐ.டி தாக்கல் செய்துள்ளது. 21 குற்றவாளிகள் தலைமறைவாக உள்ளனர். மேலும் பா.ஜ.க, ஆர்.எஸ்.எஸ்., வி.எச்.பி துவங்கிய சங்கபரிவார அமைப்புகளின் தலைவர்கள் உட்பட 14 பேரைக் குற்றவாளிகள் பட்டியலில் உள்ளனர். முன்னாள் முனிஸிப்பல் கவுன்ஸிலர் சுனிலால் பிரஜாபதி, தற்போதைய கவுன்ஸிலர் பிபின் பட்டேல் போன்றவர்களும் தலைமறைவானவர்கள் பட்டியலில் உள்ளனர். இவர்கள் இருவரும் பாஜகவைச் சேர்ந்தவர்களாவர். குற்றப்பத்திரிக்கையில் 567 சாட்சிகள் இணைக்கப்பட்டுள்ளனர்.

பாகிஸ்தானுடன் உள்ள அனைத்துவகை உறவுகளையும் துண்டிக்க வேண்டும் என்று பாரதீய ஜனதா கட்சி கோரியுள்ளது.

பாரதீய ஜனதா கட்சியின் தேசியய ஆலோசனைக் கூட்டம் நாக்பூரில் நடைபெற்று வருகிறது. இதில் கலந்து கொண்டு பேசிய கட்சியின் உயர்மட்டத் தலைவர் அருன் ஜெட்லி, கடந்த நவம்பர் மாதம் மும்பையில் நடைபெற்றத் தாக்குதலில் தொடர்புடைய குற்றவாளிகள் இந்தியாவிடம் ஒப்படைக்கப் படவேண்டும் என்றும் அவர்கள் மீதான வழக்குகள் இந்தியாவில்தான் நடைபெற வேண்டும் என்றும் கூறினார்.

பாகிஸ்தானுடன் உள்ள வணிக, கலாச்சார, சுற்றுலா மற்றும் போக்குவரத்து உட்பட அனைத்து தொடர்புகளையும் துண்டிக்க வேண்டும் என்றும் அவர் கூறினார். பாகிஸ்தானில் உள்ள இந்தியத் தூதரை திரும்ப அழைக்க வேண்டும் என்றும் அவர் கோரினார். பாகிஸ்தானுடன் காங்கிரஸ் மேற்கொள்ளும் மென்மையான போக்கை அவர் வன்மையாகக் கண்டித்தார்.

திருச்செந்தூருக்கும் சென்னைக்கும் இடையே புதிய விரைவு தொடர்வண்டி இயக்கப்படுகிறது.

இதற்கான தொடக்கவிழா இன்று மாலை திருச்செந்தூரில் நடைபெறுகிறது. நடுவண் தொடர்வண்டித்துறை அமைச்சர் லாலுபிரசாத்யாதவ் கொடியசைத்து ஓட்டத்தைத் தொடங்கி வைக்கிறார்.

விழாவில் நடுவண் உள்துறை இணையமைச்சர் இராதிகா செல்வி, தமிழக அமைச்சர்கள் டி.பி.எம்.மைதீன்கான், கீதா ஜீவன், நாடாளுமன்ற உறுப்பினர் தனுஷ்கோடிஆதித்தன், சட்டமன்ற உறுப்பினர் இராணி வெங்கடேசன், நெல்லை நகர மேயர் ஏ.எல்.சுப்ரமணியன் ஆகியோர் வாழ்த்துரை வழங்குகிறார்கள்.

செந்தூர்விரைவுவண்டி என்று பெயரிடப்பட்டுள்ள இத்தொடர்வண்டி (எண் 6736) வியாழன் தோறும் இரவு 7.15க்கு திருச்செந்தூரிலிருந்து புறப்பட்டு மறுநாள் காலை சென்னையை அடையும். மறுமார்க்கமாக வெள்ளி பிற்பகல் 03:40க்கு சென்னையிலிருந்து புறப்பட்டு மறுநாள் அதிகாலை திருச்செந்தூரை அடையும் என்று தென்னக இரயில்வே குறிப்பொன்று தெரிவிக்கிறது.

அமெரிக்காவில், கடந்த மாதம் வேலை நீக்கம் செய்யப்பட்ட சுமார் 6 இலட்சம் பேருடன் இதுவரை பொருளாதார மந்தநிலை காரணமாக வேலைஇழந்தவர்களின் எண்ணிக்கை 36 இலட்சமாக உயர்ந்துள்ளது.

கடந்த 16 ஆண்டுகளில் இல்லாத அளவாக, வேலையற்றோர் விகிதம் 7.6சதவிகிதமாக உயர்ந்திருக்கிறது.

தகவல் தொழிற்நுட்பம் என்றில்லாமல், பரவலாக எல்லாத் துறைகளிலும் கடந்த மாதம் பணிநீக்கம் நடைபெற்றுள்ளது. இது கவலையளிக்கும் போக்கு என்று அமெரிக்கத் தொழிலாளர் துறை அறிவித்துள்ளது.

தோல்விகளைச் சந்தித்து வந்த ஆஸ்திரேலியா மற்றும் இலங்கை கிரிக்கெட் அணிகள் இன்று ஆறுதல் வெற்றியடைந்துள்ளன.

சிட்னியில் நடைபெற்ற ஒருநாள்போட்டி ஒன்றில் ஆஸி. நியூசிலாந்தை 32 ஓட்டங்கள் வித்தியாசத்தில் வீழ்த்தியது. முன்னதாக நடந்த இரு ஆட்டங்களிலும் நியூசிலாந்து வென்று தொடரைக் கைப்பற்றியிருந்தது.

(சுருக்கமான ஸ்கோர்: ஆஸி: 301 ஓட்டங்கள்/50 சுற்றுகள். நியூஸி:269ஓட்டங்கள்/50சுற்றுகள்.)

கொழும்புவில் நடைபெற்ற ஆட்டமொன்றில் இலங்கை இந்தியாவை 68 ஓட்டங்கள் வித்தியாசத்தில் ஆறுதல் வெற்றிக்கண்டது. முன்னதாக நடந்த 4 ஆட்டங்களில் வென்று இந்தியா தொடரைக் கைப்பற்றியிருந்தது.

தொடர்ந்து 9ஆட்டங்களில் வெற்றியைச் சுவைத்த இந்திய அணிக்கு இது முதலாவது தோல்வியாகும்.

(சுருக்கமான ஸ்கோர்: இலங்கை:320ஓட்டங்கள்/50சுற்றுகள்
இந்தியா: 252ஓட்டங்கள்/50சுற்றுகள்.)

ஆறாவது ஊதியக்குழுவின் பரிந்துரைகளில் அதிருப்தியுற்ற முன்னாள் இராணுவ வீரர்கள் அரசு தமக்களித்த விருதுகளையும் பதக்கங்களையும் திருப்பித்தர முடிவு செய்துள்ளனர்.

ஆறாவது ஊதியக்குழு இராணுவ வீரர்களுக்கான ஓய்வூதிய கணக்கீட்டை நான்கு கால அளவுகளாகப் பிரித்து பரிந்துரைத்திருந்தது.

அதன்படி 1996க்கு முன் ஓய்வு பெற்றவர்களுக்கு ஒரு அளவீடும், 1996 முதல் 2005 வரை பணிபுரிந்தவர்களுக்கு வேறு, 2006 முதல் 2008 செப்டம்பரில் ஓய்வு பெற்றவர்களுக்கு தனி, அதன் பின்னர் ஓய்வு பெற்றவர்களுக்கு பிறிதொரு கணக்கிலும் ஓய்வூதியம் பரிந்துரைக்கப்பட்டது .

1996ல் பணிஓய்வுபெற்ற ஒரு ஹவில்தாரைக் காட்டிலும் 2006ல் ஓய்வு பெற்ற சிப்பாய் கூடுதலாக ஓய்வூதியம் பெறுவதாக இக்கணக்கீடு அமைந்துள்ளதாகக் கூறி, ஆறாவது ஊதியக்குழுவில் தங்களுக்கு நியாயம் வழங்கப்படவில்லை என்று இராணுவ வீரர்கள் டெல்லியில் நடைபெற்ற பேரணி ஒன்றில் தெரிவித்தனர்.

இந்தியாவின் தூண்களாகக் கருதப்படும் இராணுவ வீரர்களுக்கு உரிய அங்கீகாரம் வழங்கப்படவில்லை என்று கடற்படை முன்னாள் தலைவர் அட்மிரல் சுஷீல்குமார் கருத்து தெரிவித்துள்ளார்.

விரைவில் நடைபெறவுள்ள நாடாளுமன்ற தேர்தல் குறித்து ஆலோசிக்க டெல்லியில் காங்கிரஸ் கட்சியின் முக்கிய கூட்டம் நடந்தது. அப்போது காங்கிரஸ் கட்சித் தலைவர் சோனியா பேசுகையில்,

பாரதீய ஜனதா தலைமையிலான தேசிய ஜனநாயக கூட்டணி நாட்டின் மதசார்பின்மைக்கும்,
ஒற்றுமைக்கும், பொருளாதாரத்துக்கும், சமூகத்துக்கும் கேடு விளைவித்து
வருகிறது.அவர்கள் நாட்டை பிளவுப்படுத்த பார்க்கிறார்கள். நமது நாடு சமூக
நீதிக்கும், மத ஒற்றுமைக்கும் பாடுபடும் நாடு. நாட்டின் இறையாண்மை, வளர்ச்சி
மற்றும் பாதுகாப்பு ஆகியவையே காங்கிரசின் முக்கிய நோக்கம்.

என்றார். மேலும் அவர், பொருளாதார நெருக்கடி உலகம் முழுதும் சிக்கி வரும் நிலையில் இந்தியா அதை நன்றாக சமாளித்து வருகிறது என்றார்.

5 ஒருநாள் போட்டிகளைக் கொண்ட இலங்கை சுற்றுப்பயணத் தொடரின் 5ஆவதும் இறுதியானதுமான இன்றையப் போட்டியில் நிச்சயிக்கப்பட்ட 50 ஓவர்களின் இறுதியில் 320 ஓட்டங்களைப் பெற்று இலங்கை அணி வலுவான நிலையில் உள்ளது.

மதிய உணவுக்குப் பின் ஆட்டத்தைத் துவக்கிய இந்திய அணி, ஆரம்பத்திலேயே தெண்டுல்கர், கவுதம் கம்பீர், ஷேவாக் ஆகிய மூன்று முக்கிய விக்கெட்டுகளை இழந்து போராடிக் கொண்டிருக்கிறது.

10.5 ஓவர்களில் 65 ஓட்டங்களுக்கு 3 விக்கட்டுகளை இழந்துள்ள இந்திய அணிக்காக யுவராஜ் சிங் மற்றும் சர்மா ஆகியோர் தற்போது பேட்டிங் செய்து வருகின்றனர்.

பேருந்து நிலையத்தில் தூங்கிக் கொண்டிருந்த நாடோடி கூட்டத்திலுள்ள இரண்டரை வயது குழந்தை மான பங்கம் செய்யப்பட்ட கொடூரம் கேரளாவில் நடந்துள்ளது.

கோழிக்கோடு மெடிக்கல் காலேஜின் அருகிலுள்ள பேருந்து நிலையத்தில் நேற்று இரவு தூங்கிக் கொண்டிருந்த நாடோடி கூட்டத்திலிருந்து இரண்டரை வயதான குழந்தை மானபங்கம் செய்யப்பட்ட நிலையில் இன்று அதிகாலை பேருந்து நிலையத்தின் அருகிலுள்ள முட்புதரில் கண்டெடுக்கப்பட்டது.

உடல் முழுவதும் பலத்தக்காயத்துடன் கோழிக்கோடு மெடிக்கல் காலேஜில் அனுமதிக்கப்பட்டுள்ள குழந்தை, உயிருக்கு ஆபத்தான நிலையை இன்னும் கடக்கவில்லை என மருத்துவர்கள் தெரிவித்துள்ளனர்.

இக்கொடூரத்தைச் செய்தவர்களைக் காவல்துறை வலைவீசி தேடிவருகிறது.

நாடோடி கூட்டம், வேலை தேடிச் சென்ற தமிழகத்தைச் சேர்ந்தவர்கள் என்பது குறிப்பிடத்தக்கது.

இலங்கையில் சுற்றுப்பயணம் மேற்கொன்டு வரும் இந்திய கிரிக்கெட் அணி, இலங்கையுடனான 5 ஆவதும் இறுதியானதுமான ஒருநாள் போட்டியை இன்று கொழும்புவில் ஆடுகிறது.

ஏற்கெனவே முந்தைய நான்கு ஆட்டங்களிலும் அபார வெற்றி பெற்று போட்டித் தொடரைக் கைப்பற்றி விட்ட இந்தியா, இந்தப் போட்டியிலும் வென்றால் உலக தர வரிசைப் பட்டியலில் முதலிடத்தைப் பிடிக்கும்.
இலங்கை இதுவரை ஒரு போட்டியிலும் வெற்றி பெறாததால், அவமானத்தைத் தவிர்க்க இந்தப் போட்டியில் வென்றே ஆக வேண்டிய கட்டாய நிலையில் உள்ளது.

சுமார் 16 ஆண்டு காலமாக உலக கிரிக்கெட் தரவரிசை பட்டியலில் முதலிடத்தில் இருந்த ஆஸ்திரேலிய அணி, முதன் முறையாக மூன்றாம் இடத்துக்குத் தள்ளப்பட்டு, தற்பொழுது முதல் இடத்தில் தென் ஆப்பிரிக்காவும் இரண்டாம் இரண்டாம் இடத்தில் இந்தியாவும் உள்ளது. இன்றைய இலங்கையுடனான ஆட்டத்தில் இந்தியா வெற்றி பெறுமானால் முதல் இடத்துக்கு இந்தியா முன்னேறும்.

இன்றைய ஆட்டத்தில் டாஸ் வென்ற இலங்கை அணி பேட்டிங்கைத் தேர்வு செய்துள்ளது. இந்திய நேரம் 10 மணிக்கு ஆட்டம் துவங்கியுள்ளது.

ஜெயசூரியா மற்றும் தில்சன் துவக்க ஆட்டக்காரர்களாக களமிறங்கியுள்ளனர். இதுவரை 1.5 ஓவர்களில் விக்கெட் இழப்பின்றி இலங்கை 3 ரன்கள் எடுத்துள்ளது.

பாரதீய ஜனதா ஆட்சியமைத்தால் அயோத்தியில் ராமர் கோயில் கட்டப்படும் என்று அக்கட்சியின் தலைவர் கூறினார்.

நாடாளுமன்றத் தேர்தல் நெருங்கி வரும் நிலையில் பாரதீய ஜனதா கட்சியின் தேர்தல் வியூகம் குறித்து விவாதிப்பதற்காக நாக்பூரில் இரண்டு நாள்களாக தேசிய ஆலோசனைக் கூட்டம் நடைபெற்று வருகிறது. இதில் பேசிய பா.ஜ.க. தலைவர் ராஜ்நாத் சிங் அயோத்தியில் மிகப் பெரிய அளவில் ராமர் கோவில் கட்டுவதில் பாரதீய ஜனதா கட்சி உறுதியாக இருக்கிறது என்று கூறினார். அதற்கான வாய்ப்புக்காக காத்திருக்கிறோம். பா.ஜ.க. தனி மெஜாரிட்டியுடன் ஆட்சியமைத்தால் இதற்கென சட்டமியற்றப் படும் என்று கூறினார்.

பாரதீய ஜனதா கட்சியின் முக்கிய கூட்டணிக் கட்சிகளான ஐக்கிய ஜனதா தளம், பிஜு ஜனதா தளம் போன்ற கட்சிள் இராமர் கோயில் கட்டுவது தேசிய ஜனநாயகக் கூட்டணியின் செயல் திட்டத்தில் உள்ளது இல்லை என்று கூறி உள்ளன.

பாபர் மசூதியை சங்பரிவாரம் இடிக்கவில்லை, அரசுதான் இடித்தது என்று ஆர். எஸ். எஸ் தலைவர் கூறினார்.

மத்தியப் பிரதேச மாநிலம் ஷஜாபூர் நகரில் நடந்த பொதுக் கூட்டத்தில் பேசிய ஆர். எஸ் எஸ் தலைவர் சுதர்ஸன், பாபர் மசூதி அரசு ஆட்களால்தான் இடிக்கப்பட்டது. கரசேவகர்கள் பாபர் மசூதியை இடிக்கவில்லை என்று கூறினார்.

மாநிலத்தில் ஆட்சியிலிருந்து பாரதீய ஜனதாவின் பெயரையோ அல்லது மத்திய அரசு அமைத்திருந்த காங்கிரஸ் கட்சியின் பெயரையோ குறிப்பிடாத அவர், 1992 ஆம் ஆண்டு பாபர் மசூதி இடிக்கப்பட்ட அன்று தான் அயோத்தியாவில் இருந்ததாகவும், பிரச்சனைக்கு அப்பாற்பட்ட இடத்தில் ராமர் கோயில் கட்ட முனைந்ததாகவும் ஆனால் அரசின் ஆட்கள் பாபர் மசூதியை இடித்ததால் அங்கு ராமர் கோயில் கட்ட முடியவில்லை என்றும் அவர் கூறினார்.

மகாத்மா காந்தியின் கொள்கைகளை சங்பரிவார்களிடமே காண முடியும். காங்கிரஸ் கட்சியினரிடம் காண முடியாது என்று பாரதீய ஜனதா கட்சி இன்று கூறியது.

காங்கிரஸ் கட்சிக்கும் காந்திக்கும் காந்தி என்ற குடும்பப் பெயர் சேர்ப்பதைத் தவிர எந்தவகை தொடர்பும் இல்லை. நாங்கள்தான் காந்தியின் கொள்கைகள் வழி நடந்து அவரது பணிகளைத் தொடர்நது கொண்டுள்ளோம் என்று பாரதீய ஜனதா கட்சியின் தலைவர் ராஜ்நாத் சிங் இன்று கூறினார்.

உலகப் பொருளாதார நெருக்கடியில் பெரும் பாதிப்புக்குள்ளாகி உள்ள முதலாளித்துவமோ அல்லது ஏற்கனவே தோல்வியுற்றுவிட்டவோ கம்யூனிசமோ இந்தியாவுக்கு ஏற்புடையதன்றும் காந்தியின் பொருளாதார முறையே இந்தியாவுக்கு சரியான பொருளாதார முறை என்று பா.ஜ.க. நேற்று கூறியது.

இந்தியா சுதந்திரம் பெற்ற சில மாதங்களுக்குள் காந்தியை சங்பரிவாரங்களில் ஒன்றான ஆர்.எஸ்.எஸ். என்ற அமைப்பைச் சேர்ந்த நாதுராம் கோட்சே சுட்டுக் கொன்றான் என்பது வரலாறு.

அ தி மு க வில் இருந்து ஒதுக்கி வைக்கப்பட்டுள்ள மயிலாப்பூர் தொகுதி சட்டமன்ற உறுப்பினர் எஸ்.வி.சேகர் தென்னக பிராமணர் சங்கக் கூட்டமைப்பு என்ற புதிய அமைப்பை இன்று மாலை சென்னையில் தொடங்க உள்ளார்.

பிராமணர்களுக்கு இட ஒதுக்கீடு கேட்பதே நோக்கம் என்று தெரிவித்துள்ள அவர், தமிழ்நாட்டில் சுமார் 40 இலட்சம் பிராமணர்கள் இருப்பதாகவும், அவர்களின் எண்ணிக்கை ஆண்டுக்கு ஆண்டு கூடிக்கொண்டே செல்வதால், அரசு 7 சதவிகித இடஒதுக்கீடு வழங்க வேண்டும் என்றும் கோரியுள்ளார்.

பாகிஸ்தான் அணு விஞ்ஞானி அப்துல்காதர்கான் வீட்டுக்காவலிலிருந்து விடுவிக்கப்பட்டுள்ளது குறித்து அமெரிக்கா கவலை தெரிவித்துள்ளது.

"இது துரதிருஷ்டவசமானது" என்ற அமெரிக்க வெளியுறவு அமைச்சர் ஹிலாரி, இந்நிகழ்வு கவலையளிப்பதாகவும், இதன் மூலம் வடகொரியா,ஈரான் ஆகியவற்றின் தொடர்புகள் வலுவடையும் என்றும் கருத்து தெரிவித்துள்ளார்.

கட்டுமானப் பொறியியல் துறையில் புகழ்பெற்ற எல் & ட்டீ நிறுவனம் இன்னும் மூன்று ஆண்டுகளில் 10,000 பேருக்கு வேலைத் தரப்படும் என்று அறிவித்துள்ளது.

ஹசீரா என்னுமிடத்தில் ரூ. 4,500 கோடி முதலீட்டில் அமைக்கப்படவுள்ள உற்பத்தி தொழிற்சாலையில் 5000 பேரை வேலைக்கு எடுக்கவும், மற்ற திட்டங்களான மோனோ ரயில் திட்டம், பவர் ரியாக்டர் போன்றவற்றில் மேலும் 5000 பேரை வேலைக்கமர்த்தவும் இந்நிறுவனம் முடிவு செய்துள்ளது

மாதம் ரூ. 4.30 இலட்சம் சம்பளம் பெற்றுக்கொண்டிருந்த தனது விமானிகள் அனைவருக்கும் ரூ.80,000/= குறைவு செய்து கிங்ஃபிஷர் விமான நிறுவனம் அறிவித்துள்ளது.

டெக்கான் ஏர்வேய்ஸ் நிறுவனத்தை தன்னுடன் இணைத்துக்கொண்ட கிங்ஃபிஷர் நிறுவனம், டெக்கான் நிறுவன விமானிகள் பெற்ற சம்பள விகிதத்துடன் சமப்படுத்துவதற்காக தனது விமானிகளுக்கும் சம்பளக் குறைப்பு முடிவை எட்டியதாக நிறுவன அதிகாரி ஒருவர் தெரிவித்துள்ளார்.

இம்முடிவு விமானிகளிடையே கடும் அதிருப்தியை ஏற்படுத்தியிருப்பதாகவும், 600 விமானிகளை உறுப்பினர்களாகக் கொண்ட அமைப்பொன்று நீதிமன்றத்தை நாடவிருப்பதாகவும் செய்திகள் தெரிவிக்கின்றன.

போலி என்கவுண்டர்கள் நடத்தும் காவல்துறையினருக்கு எதிராக கொலை வழக்கு பதிவு செய்யப்பட வேண்டும் என ஆந்திரபிரதேச உயர்நீதி மன்றம் உத்தரவிட்டுள்ளது.

தற்பாதுகாப்புக்காகவே கொல்ல வேண்டிய சூழல் ஏற்பட்டது எனில், அதற்கான உரிய ஆதாரங்களை நீதிமன்றத்தில் சமர்ப்பிக்க வேண்டும். தேவைக்கு அதிகமான சக்தியைக் காவல்துறையினர் உபயோகிக்கக் கூடாது எனவும் சட்டத்தைப் பாதுகாக்க வேண்டிய கடமையுள்ளவர்களுக்கு எவருடைய உயிரையும் எடுப்பதற்கு எவ்வித உரிமையும் இல்லை எனவும் நீதிமன்றம் கருத்து தெரிவித்தது.

அமெரிக்க இராணுவ விமான தளம் மூடுவது உறுதி செய்யப்பட்டுவிட்டது என்று கிர்கிஸ்தான் அரசு மீண்டும் கூறியுள்ளது.

டாடா நிறுவனத்தின் தயாரிப்பில் உலகத்தின் மிக விலை குறைந்த கார் 'நானோ' மார்ச் 3ம் தேதி விற்பனைக்கு வரும் என்று தெரிகிறது.

டாடா நிறுவனர் ஜாம்செட்ஜி டாடாவின் நூற்றாண்டு பிறந்த நாள் மார்ச் 3 என்பதால் அந்நாள் தேர்ந்தெடுக்கப்பட்டதாக செய்திகள் தெரிவிக்கின்றன எனினும் டாடா நிறுவனம் இச்செய்தியை இதுவரை உறுதி செய்யவில்லை.

சீனாவில் செல்பேசி வெடித்ததில் வாலிபர் ஒருவர் மரணமடைந்துள்ளார். குவான்சு மாகாணத்தில் கணினி கடையொன்றில் அவ்வாலிபர் பணிபுரிந்துவந்துள்ளார்.



சீனாவில், கடந்த ஏழாண்டுகளில் இது ஒன்பதாவது சம்பவம் என்று தெரிவித்துள்ள காவல்துறையினர், லிதியம் என்ற உலோக தனிமத்தைப் பயன்படுத்தி செய்யப்படும் மின்கலன்(Batery) அதிக வெப்பம் தாங்காமலும், அதிக மின்னூட்டம் பெற்றாலும் இப்படி வெடித்துவிடுகின்றன என்றனர்.

குஜராத் மாநிலம் பரூச் மாவட்டத்தில் ஜகாதியா தாலுக்காவிற்குட்பட்ட தேஷ்பூர் எனும் கிராமத்தில் சுமார் 1200 கிலோ எடையுள்ள அமோனியம் நைட்ரேட்டை தீவிரவாத எதிரப்பு காவல்துறை கைப் பற்றி உள்ளது.

அணு ஆயுத இரகசியங்களை வெளிநாட்டுக்கு விற்றதாக பாகிஸ்தானிய அரசால் குற்றம் சுமத்தப்பட்டு 4 வருடமாக வீட்டுக்காவலில் வைக்கப்பட்டிருந்த விஞ்ஞானி அப்துல் காதிர்கானை பாகிஸ்தானின் இஸ்லாமாபாத் உயர்நீதிமன்றம் விடுவித்துள்ளது.

அவர் சுதந்திரமான மனிதர் என்று கூறியுள்ள நீதிமன்றம், பாகிஸ்தானுக்குள் எங்கு வேண்டுமானாலும் சென்று வரவும், ஆராய்ச்சிக்கூடத்திற்குச் செல்லவும், நண்பர்கள், உறவினர்களைச் சந்திக்கவும் தடையில்லை என்று அறிவித்துள்ளது.

பாகிஸ்தான் அரசுக்கும் அணுவிஞ்ஞானி அப்துல்காதிர்கானுக்கும் இடையே உடன்பாடு எட்டப்பட்டிருப்பதாகவும் செய்திகள் தெரிவிக்கின்றன

நாட்டில் அரசியல் சமூக தளங்களில் முக்கிய நிகழ்வுகள் நடைபெறும் போது லயோலா கல்லூரி பொதுமக்களிடம் கருத்துக்கணிப்பு நடத்தி மக்கள் கருத்தை வெளியிட்டு வருவதை வழக்கமாகக் கொண்டிருக்கிறது.

ஈழப்பிரசினை குறித்தும் கருத்துக்கணிப்பு நேற்று வெளியிடப்பட்டுள்ளது.

தீவிரவாதத்திற்கு எதிராக என்ற போர்வையில் தமிழினத்தையே இலங்கை அரசு அழித்தொழித்து வருவதாக 86 விழுக்காடு தமிழ்நாட்டினர் கருத்து
தெரிவித்துள்ளனர்.

90 விழுக்காடு பொதுமக்கள் போர் உடனடியாக நிறுத்தப்படவேண்டும் எனவும் 68 விழுக்காட்டினர் தனி ஈழமே இப்பிரசினைக்கு தீர்வு என்று தெரிவித்துள்ளனர். தமிழக அரசியல் கட்சிகளால் இப்பிரசினையில் எந்த விளைவினையும் ஏற்படுத்த முடியவில்லை என்று 52 % பேர் அபிப்ராயம் சொல்லியிருக்கிறார்கள்.

தேர்தல் அரசியல் பலனை நோக்காமல் கருணாநிதி தலைமையில் தமிழக அரசியல் கட்சிகள் இப்பிரசினையில் ஒன்றுபட்டு செயலாற்ற 86% பேர் கருத்தளித்துள்ளனர்.

இரயில்வே பாதுகாப்புப் படையில் (RPF) அதிகாரிகளாக பெண்கள் நியமிக்கப் படுவார்கள் என்று இன்று அறிவிக்கப் பட்டுள்ளது.

வரும் நாடாளு மன்றத் தேர்தலில் தனித்துப் போட்டியிடுவதா அல்லது சமாஜ்வாதி ஜனதாவுடன் கூட்டணி அமைத்துப் போட்டியிடுவதா என்பதை வரும் 11ஆம் தேதி முடிவு செய்யப்படும் என்று அக்கட்சியின் மாநிலத் தலைவர் கூறினார்.

இந்தியன் பிரீமியர் லீக் ஆட்டத்துக்கான வீரர்களுக்கு நடந்த ஏலத்தில் இங்கிலாந்தின் முன்னணி வீரர்களான ஆன்ட்ரூ பிளின்டாப் மற்றும் கெவின் பீட்டர்சன் ஆகியோர் மிக அதிக விலை கொடுத்து வாங்கப் பட்டனர்.

50 இந்திய மீனவர்களை பாகிஸ்தான் கடற்படை கைது செய்துள்ளது. அவர்கள் உபயோகித்த 9 படகுகளும் கைப்பற்றப் பட்டுள்ளதாக அறிவிக்கப் பட்டுள்ளது.

இந்தியக் குடியரசுத் துணைத் தலைவர் ஹமீத் அன்சாரி மியான்மரில் சுற்றுப் பயணம் மேற்கொண்டுள்ளார். இன்று அவர் மியான்மரின் இராணுவத் தலைவர் தான் ஷியைச் சந்தித்து இருதரப்பு உறவுகள் குறித்து பேச்சுவார்த்தை நடத்தினார்.

இந்திய கம்யூனிஸ்ட் கட்சியின் மாநிலச் செயலாளர் தா.பாண்டியனின் காரை சிலர் தீவைத்து எரித்துள்ளனர். அவரது கார் பெருமளவு சேதமடைந்துள்ளது.

விடுதலைப் புலிகளின் கடற்படைத் தளத்தைக் கைப்பற்றி விட்டதாக இலங்கை இராணுவம் அறிவித்துள்ளது.

நேற்று காலை அமைச்சரவைக் கூட்டத்தில் கலந்து கொண்ட பின்னர் உள்துறை அமைச்சர் ப.சிதம்பரம் செய்தியாளர்களிடம் பேசுகையில்,

இலங்கையில் நடந்து வரும் நிகழ்வுகள் குறித்து இந்திய அரசு கவலை கொண்டிருக்கிறது. இலங்கை அரசு வினோதப் பிடிவாதத்தைக் கைவிட வேண்டும். அதேபோல விடுதலைப் புலிகளும் தங்களது தாக்குதலை நிறுத்த வேண்டும். இரு தரப்பும் இந்தியாவின் கோரிக்கையை காது கொடுத்துக் கேட்க வேண்டும்.

இந்தியா தனது செல்வாக்கினால், 48 மணி நேர போர் நிறுத்தத்தை இலங்கை அரசு அறிவிக்கும் படிச் செய்தும் விடுதலைப் புலிகள் தரப்பிலிருந்து எந்தப் பதிலும் இல்லை. தற்போது மீண்டும் ராணுவ நடவடிக்கை தொடங்கியுள்ளது. இன்னும் கூட புலிகளிடமிருந்து பதில் இல்லை. இலங்கை அரசு தனது தாக்குதலை நிறுத்த வேண்டும்.
இரு தரப்பும் போரை நிறுத்தி விட்டுப் பேச முன்வர வேண்டும். இரு கைகளும் சேர்ந்தே ஓசை எழுப்ப முடியும். உயிர்கள் அநியாயமாக பறிபோவது மனதுக்கு வேதனையாக உள்ளது. எங்களால் என்ன செய்ய முடியுமோ அதை இந்திய அரசு நிச்சயம் செய்யும்

என்று கூறியுள்ளார்.

பன்னாட்டு நீதிமன்றத்தில் இலங்கை அரசுக்கெதிராக இனப்படுகொலை வழக்கு தொடர இந்திய கம்யூனிஸ்ட் கட்சி முடிவெடுத்து அறிவித்துள்ளது.

மதுரையில் இன்று செய்தியாளர்களிடம் பேசிய மாநிலச் செயலாளர் தா.பாண்டியன், ஐக்கிய நாடுகள் சபையின் பொதுச் செயலாளர் இலங்கைக்கு நேரில் சென்று பார்வையிடவும் அங்கு உடனடியாக போரை நிறுத்த இலங்கை அரசை வலியுறுத்தவும் கேட்டுக்கொண்டுள்ளார்.

"இலங்கையில் போ‌ர் நிறுத்த‌ம் செ‌ய்த பின்னரே அரசியல் தீர்வு குறித்து பேச வேண்டும்" என்றார் அவர்.

"இலங்கைப் பிரச்சனையில் த‌மிழக அரசு இதுவரை எடு‌த்த முடிவுகள் எதுவும் பலனளிக்கவில்லை. இலங்கைப் பிரச்சினைக்காக என்ன வேண்டுமானாலும் செய்யத் தயார் என்று கூறிய முதலமை‌ச்ச‌ர் கருணாநிதி தற்போது பதவி விலக மறுக்கின்றார். பன்னாட்டு நீதிமன்றத்தில் தனிநபர் வழக்கு தொடரலாம் எ‌ன்று அறிவிக்கப்பட்டு‌ள்ளதா‌ல் மனித உரிமைக் கழக வழக்கறிஞர்கள் மூலம் இலங்கைப் பிரச்சினை குறித்து அங்கு வழக்கு தொடரப்படும் ".

ஆயினும், 'எதிர்வரும் நாடாளுமன்ற தேர்தலில் இலங்கைப் பிரச்சினையை முன் வைக்கமாட்டோம். இலங்கை பிரச்சினைக்காக எதிர்வரும் நாடாளுமன்ற தேர்தலை புறக்கணிக்க வேண்டும் என்ற கருத்து ஏற்புடையதல்ல". என்றார் தா.பா

புகையிலை, பான்பராக் போன்ற போதை பொருள்களை பொது இடங்களில் உபயோகிக்க மத்திய சுகாதார அமைச்சகம் தடை விதித்துள்ளது தெரிந்ததே.

திரைப்படத்தில் நடிகர்கள் புகை பிடிக்கும் காட்சிகளை தவிர்க்குமாறும் அமைச்சர் அன்புமணி கேட்டுக்கொண்டிருந்தார். பொது மக்களிடையே நல்ல வரவேற்பை பெற்றுள்ள இவ்வறிவிப்பைத் தொடர்ந்து, சுகாதார அமைச்சகம் அழகு சாதனங்களாக நடமாடும் வேதிப்பொருட்களை குறிவைத்துள்ளது.
இளம் வயதினரிடையே அழகு சாதன பொருட்கள் மீதும் மோகம் அதிகரித்து வருவது குறிப்பிடத்தக்கது.

ஏராளமான உள் நாட்டு, வெளிநாட்டு நிறுவனங்களும் சந்தையில் களமிறங்கி உள்ள நிலையில் அழகு சாதன பொருட்களை தயாரித்து விற்பனை செய்து வருவோருக்கு சுகாதார அமைச்சகம் 'செக்' வைத்திருக்கிறது. விளம்பரத்தில் சொல்லப்படுவது போல உண்மையிலேயே அழகு சாதனங்கள் அழகு கூட்டுகிறதா, உடல்நலத்துக்குக் கேடான வேதிப்பொருட்கள் கலக்காமல் இருக்கின்றனவா? என்பது குறித்து மத்திய அரசு தீவிர ஆய்வு செய்து வருகிறது.

தயாரிப்பு நிறுவனங்களுக்கு அமைச்சர் விடுத்துள்ள அறிவிப்பில் அழகு சாதன பொருட்கள் விளம்பரங்களில் சொல்லப்படுவதை நிரூபிக்க வேண்டும் என்று கூறியுள்ளார்.அறிவியல் ரீதியான ஆதாரங்களை தாக்கல் செய்ய வேண்டும் என்று அமைச்சகம் அறிவித்துள்ளது.

உடல் நலத்துக்கு தீங்கு விளைவிக்கும் துரித உணவுகள், மதுவுக்கு எதிராகவும், அமைச்சர்அன்புமணியின் உத்தரவின் பேரில் நடவடிக்கை எடுக்கப்பட்டு வருவது குறிப்பிடத்தக்கது

கடந்த 1992-ம் ஆண்டு பாபர் மசூதி இடிக்கப்பட்டதற்காக உ.பி. முன்னாள் முதலமைச்சர் கல்யாண் சிங் முஸ்லிம்களிடம் மன்னிப்பு கோரியிருந்தார்.

பாபர் மசூதி இடிக்கப்பட்டதுமே அதற்கு பொறுப்பேற்று தான் முதல்-மந்திரி பதவியில் இருந்து விலகியதாகவும் பாபர் மசூதி இடிப்புக்காக தற்போது மீண்டும் மன்னிப்பு கேட்டுக்கொள்வதாகவும் அவர் சொல்லியிருந்தார். முஸ்லிம் மக்களுக்கு எதிரான செயல்களில் ஈடுபடும் பா.ஜ கவை வீழ்த்துவதற்காக முலாயம்சிங் யாதவுடன் அணி சேர்ந்து இருப்பதாகவும் கல்யாண்சிங் கூறியிருந்தார்.


முலாயம்சிங்குடன் கல்யாண்சிங் கூட்டு சேர்ந்ததை முஸ்லிம் மக்கள் ஏற்றுக் கொள்ள அவர்களை சமாதானப்படுத்தும் விதமாக அவர் இவ்வாறு கூறி இருந்தும், கல்யாண்சிங் மன்னிப்பை முஸ்லிம் தலைவர்கள் நிராகரித்து உள்ளனர்.

ஜாமியத்துல் உலமா அமைப்பு நிர்வாகி மவுலானா ஹமீது "கல்யாண்சிங்கின் இந்த மன்னிப்பு அரசியல் சந்தர்ப்ப விதம் ஆகும். இதை ஏற்க இயலாது" என்று கூறியுள்ளார். "இந்த குற்ற செயலுக்காக அவர் இறைவனிடம் தான் மன்னிப்பு கேட்க வேண்டும்" என்றார் அவர்.

பாபர் மசூதி நடவடிக்கை குழு முன்னாள் உறுப்பினர் செய்யது சகாப்தீன் "முஸ்லிம்களைபற்றி தவறாக கணக்கு போட்டுள்ளனர்.இது ஒரு அரசியல் நாடகம்" என்று கூறியுள்ளார்.

அலிகார் முஸ்லிம் பல்கலை கழக பேராசிரியர் மொகிபுல் ஹக் கூறுகையில், இந்துத்துவாவில் இருந்து மதசார்பற்ற அணிக்கு கல்யாண்சிங் வந்துள்ளதை வரவேற்கிறேன். அதே நேரத்தில் அவர் மன்னிப்பு கேட்டதற்காக முஸ்லிம்கள் ஓட்டுகள் சமாஜ்வாடிகட்சி எந்த வகையிலும் உதவாது என்றார்.

மும்பை தீவிரவாதத் தாக்குதல்இல் கைது செய்யப்பட்ட அஜ்மல் ஆமிர் கஸப் மற்றும் தீவிரவாதிகள் இந்தியாவிற்குக் கடல் வழியாக வர உபயோகித்த குபேர் என்ற படகிலிருந்துக் கிடைத்த ஓவர்கோட்டிலிருந்துச் சேகரிக்கப்பட்ட டி.என்.ஏ சாம்பிள்களுக்கிடையில் ஒற்றுமையுள்ளதாக மும்பை ஜாயிண்ட் கமிஷனர் ராகேஷ் மரியா அறிவித்துள்ளார்.

தீவிரவாதிகள் குபேர் என்றப் படகில் தான் இந்தியா வந்தனர் என்பதற்கான ஆதாரமாகவும் இது அமையும் என்றும் அவர் தெரிவித்தார்.

கஸப் இறந்து விட்டதாக முன்பு பாகிஸ்தான் கூறியிருந்தது. ஆனால், கையில் கட்டுகளுடன் கைவிலங்கு அணியப்பட்ட நிலையில் கஸப் இருக்கும் புதிய புகைப்படங்களைக் கடந்த தினங்களில் தொலைகாட்சிகள் வெளியிட்டிருந்தன என்பது குறிப்பிடத்தக்கது.

ஹோலோகாஸ்ட் எனப்படும் யூதப்படுகொலைகள் நடக்கவே இல்லை என்று கூறிவந்த பிரிட்டனைச் சேர்ந்த ரிச்சர்ட்சன் என்ற பிஷப் உட்பட 4 பிஷப்கள் 1988ஆம் ஆண்டு கிருத்தவ திருச்சபையிலிருந்து நீக்கப்பட்டிருந்தனர். கடந்த மாத இறுதியில் இந்த நான்கு பிஷப்புகளையும் மீண்டும் கிருத்தவ திருச்சபையில் இணைத்து போப் உத்தரவிட்டார்.

இந்து தீவிரவாத அமைப்புக்கு உதவியதாக இரு பத்திரிகையாளர்கள் உள்பட நால்வரை கைது செய்துள்ளதாக நேபாள காவல்துறை இன்று அறிவித்தது.

பாபரி மஸ்ஜித் தகர்க்கப்பட்டதில் வருத்தம் கொள்வதாகவும் செய்து போன தவறுக்காக மன்னிப்பு கோருவதாகவும் உத்தரபிரதேச முன்னாள் முதல்வர் கல்யாண்சிங் கூறினார்.

பாஜகவிலிருந்து வெளியேறிய கல்யாண்சிங் கடந்தச் சில நாட்களுக்கு முன்னர் முலாயம் சிங்கின் கட்சியில் இணைந்திருந்தார். முலாயம் சிங்குடன் இணைந்து எதிர்வரும் பாராளுமன்ற தேர்தலுக்கான பணிகளில் ஈடுபட்டுக் கொண்டிருக்கும் வேளையில் கல்யாண்சிங்கிடமிருந்து இவ்வறிக்கை வெளியாகியுள்ளது குறிப்பிடத்தக்கது.

"பாஜகவை அழிப்பதே இனி எனது இலட்சியம்" எனவும் கல்யாண்சிங் கூறினார். "பாபரி மஸ்ஜித் என்னுடைய ஆட்சி காலத்தில் தகர்க்கப்பட்டிருந்தாலும் முஸ்லிம்களை அகற்றி நிறுத்துவதற்கோ அவர்களை எதிரியாக கருதுவதற்கோ நான் தயாராகவில்லை" என அவர் மேலும் கூறினார். பாஜகவை விட்டு விலகியதை ஆதரித்து அநேக முஸ்லிம் நண்பர்கள் தனக்குக் கடிதம் எழுதியதாகவும் அவர் தெரிவித்தார்.

இலங்கையில் போதை நிறுத்த இந்திய அரசு வலியுறுத்த வேண்டும் என்று கோரி இலங்கைத் தமிழர் பாதுகாப்பு இயக்கம் சார்பில் தமிழகம் முழுவதும் முழு அடைப்புக்கு அழைப்பு விடப்பட்டிருந்தது. வணிகர் சங்கங்கள் உள்பட பல்வேறு அமைப்புகளும் இந்த முழு அடைப்புக்கு ஆதரவு தெரிவித்திருந்தன. இதனால் சென்னையில் பெரிய அளவில் பாதிப்பு இல்லை. என்றாலும் மற்ற மாவட்டங்களில் பெருமளவும் கடைகள் மூடப்பட்டிருந்ததாக தகவல்கள் தெரிவிக்கின்றன.

கிர்கிஸ்தானில் உள்ள அமெரிக்க இராணுவ விமான தளம் மூடப்படும் என்று கிர்கிஸ்தான் அதிபர் குர்மன்பக் பகியேவ் செவ்வாய் கிழழை அறிவித்தார்.

இலங்கையில் ராணுவத்திற்கும் விடுதலைப் புலிகளுக்குமிடையிலான போர் உச்சக்கட்டத்தை எட்டியுள்ள வேளையில், அமெரிக்கா தலைமையிலான சர்வதேசக் குழு புலிகளை சரணடையும்படி வலியுறுத்தியுள்ளது. இந்தக் குழுவில் அமெரிக்கா, ஐரோப்பிய ஒன்றியம், ஜப்பான், நார்வே ஆகிய நாடுகள் இடம் பெற்றுள்ளன.

புலிகளுக்கு மிகக்குறைவான கால அவகாசமே இருக்கிறது என்பதால் இரு தரப்பிலும் ஏற்படும் வீணான உயிர்ச்சேதங்களை தவிர்ப்பதற்காக புலிகள் சரணடைவதே சிறந்தது என அக்குழுவின் அறிக்கை தெரிவிக்கிறது.

இலங்கை அரசாங்கத்திடம் ஆயுதங்களை ஒப்படைத்து சரணடைவது தொடர்பான பேச்சு வார்த்தைகளை புலிகள் தரப்பு விரைவில் தொடங்க வேண்டும் எனவும் அந்த அறிக்கை வேண்டுகோள் விடுத்திருக்கிறது.

இந்த அறிக்கைக்கு புலிகள் தரப்பிலிருந்து இதுவரை பதில் அளிக்கப்படவில்லை.

கடந்த ஆண்டு 57 பேரை பலிவாங்கிய அஹமதாபாத் தொடர் குண்டு வெடிப்பு தொடர்பாக மேலும் 5 குற்றப் பத்திரிகையை காவல் துறை தாக்கல் செய்தது.

மத்திய அரசுக்கு எதிரான நம்பிக்கையில்லா தீர்மானத்தின் மீதான ஓட்டெடுப்பின் பொழுது, அரசுக்கு ஆதரவாக ஓட்டளிக்க லஞ்சம் அளித்ததாகக் கூறி பாஜக எம்பிக்கள் பாராளுமன்றத்தில் சபாநாயகர் முன்னிலையில் கோடி ரூபாய்களைக் கொட்டிய சம்பவம் தொடர்பாக பாஜகவின் பிரதமர் வேட்பாளரான அத்வானியின் மிக நெருங்கிய உதவியாளரான சுதீந்திரா குல்கர்ணிக்கு எதிராக கிரிமினல் வழக்கு பதிவு செய்யும் படி டில்லி காவல்துறைக்கு மத்திய அரசு உத்தரவிட்டுள்ளது.

எம்பிக்களுக்கு லஞ்சம் கொடுத்து ஓட்டு வாங்க முயற்சி நடந்தது தொடர்பாக சபாநாயகர் சோமநாத் சாட்டர்ஜி பாராளுமன்ற சமிதியை நியமித்திருந்தார். இச்சமிதி வழங்கிய அறிக்கையினை டில்லி காவல்துறைக்கு வழங்கிய மத்திய அரசு, குல்கர்ணி உட்பட மேலும் இருவர் மீது வழக்கு பதிவு செய்ய உத்தர்விட்டது. மேலும், கடந்த கிறிஸ்துமஸிற்கு முந்தைய நாளில் பாஜக தலைமையகத்தில் இருந்து திருட்டுப் போன இரண்டு கோடி ரூபாய்க்கும் பாராளுமன்றத்தில் பாஜக எம்பிக்கள் கொண்டுவந்த பணத்திற்கும் ஏதாவது தொடர்பு உள்ளதா? என்பதைக் குறித்து விசாரிக்கவும் உத்தரவிட்டுள்ளது.

இதன் அடிப்படையில், பாஜக அலுவலகத்தில் பணம் திருட்டுப் போன அறையைப் பரிசோதிக்க அனுமதி தர வேண்டும் என பாஜக தலைவர் ராஜ்நாத் சிங்கிடம் டில்லி காவல்துறை ஆணையர் அனுமதி கோரியுள்ளார். இத்திருட்டு சம்பவம் தொடர்பாக பாஜக காவல்துறையில் புகார் எதுவும் அளிக்காதது குறிப்பிடத் தக்கது.

ஆயிரக்கணக்கான மக்கள் கலந்துகொண்ட தீவிரவாத எதிர்ப்பு மாநாடு ஒன்று கர்நாடக மாநிலத்தலைநகர் பெங்களூரூவில் அரண்மனை மைதானத்தில் நடந்தேறியதாகச் செய்திகள் தெரிவிக்கின்றன.

ஜமியியத் யே உலமாயே ஹிந்த் என்ற முஸ்லிம் அறிஞர்கள் அமைப்பு ஏற்பாடு செய்த இம்மாநாட்டில் பல்லாயிரக்கணக்கான மக்களுடன் ஹிந்து, இஸ்லாமிய அறிஞர்களும் பங்கேற்றுள்ளனர்.

தீவிரவாதம் அதன் எல்லா வடிவங்களிலும் எதிர்க்கப்படவேண்டும் என்று இம்மாநாட்டில் தீர்மானம் நிறைவேற்றப்பட்டு, தீவிரவாத எதிர்ப்பு உறுதிமொழியும் மக்களிடம் பெறப்பட்டது.

ஜம்யியத்துல் உலமா யே ஹிந்த் தலைவர் சையத் முஹம்மத் உஸ்மான், பாராளுமன்ற உறுப்பினர் மெளலானா மஹ்மூது மதனி, ஆரிய சமாஜின் சுவாமி அக்னிவேஷ், ஸ்ரீ ஸ்ரீ ரவிஷங்கர், ஹிந்தி திரைப்பட இயக்குநரும் தயாரிப்பாளருமான மகேஷ்பட் ஆகியோரும் இம்மாநாட்டில் கலந்துகொண்ட பிரபலங்களில் சிலர்.

தீவிரவாதத்தை ஒடுக்குவதில் சார்பற்று செயல்படுவதற்கும், அண்மைக்காலத்தில் புதிதாக அறிய வந்துள்ள தீவிரவாதங்களின் கைவரிசைகள் குறித்த நேர்மையான விசாரிப்புக்கும் இம்மாநாடு அரசை வலியுறுத்தியுள்ளது.

கடந்த 2003-ம் ஆண்டு இராக் மீது தாக்குதலை அமெரிக்கா தொடங்கியது முதல் அந்த நாட்டில் அமெரிக்க ராணுவம் குவிக்கப்பட்டது. இப்போது அந்த நாட்டில் ஒரு லட்சத்து 40 ஆயிரம் அமெரிக்க ராணுவ வீரர்கள் உள்ளனர். அங்கு இருந்து ராணுவத்தை திரும்பப்பெற வேண்டும் என்று அமெரிக்கர்கள் உட்பட பல நாட்டினரும் கோரி வந்தனர். இதற்கு முந்தைய ஜனாதிபதி புஷ் சம்மதிக்கவில்லை.

இந்த நிலையில் தேர்தல் பிரசாரத்தின் போதே ஒபாமா, மாதம் ஒன்று அல்லது இரண்டு படைப்பிரிவு என்ற அடிப்படையில் 16 மாதத்துக்குள் ஈராக்கில் இருந்து அமெரிக்க இராணுவத்தை திரும்பப் பெறுவோம் என்று உறுதி மொழி கொடுத்திருந்தார்.

என்.பி.சி. டி.வி சேனலுக்கு அளித்த சமீப பேட்டியில், ஒரு ஆண்டு காலத்துக்குள் பெரும் அளவில் அமெரிக்க ராணுவ வீரர்கள் நாடு திரும்புவார்கள் என்றும் ஈராக்கியர்கள் மீது மேலும் அதிகமான பொறுப்புகளை சுமத்தக்கூடிய நிலையில் தாங்கள் இருப்பதாகவும் ஒபாமா கூறி உள்ளார்.

அதே நேரம், ஆப்கானிஸ்தானில் இப்போது 36 ஆயிரம் அமெரிக்க ராணுவத்தினர் இருக்கிறார்கள். இந்த எண்ணிக்கையை 18 மாதங்களுக்குள் 60 ஆயிரத்திற்கும் அதிகப்படுத்தப்படுத்தலாமா என்று ஒபாமா நிர்வாகம் ஆலோசித்து வருவதாக செய்திகள் வெளியாகியுள்ளன.

முன்னாள் பிரதமர் வாஜ்பேயி இன்று இரவு அகில இந்திய விஞ்ஞானக் கழக மருத்துவமனையில் இதயக்கோளாறு காரணமாக சேர்க்கப்பட்டுள்ளார்.

இன்று இரவு 10.00 மணிக்கு ஐசியூ என்று சொல்லப்படும் இண்டென்சிவ் கேர் யூனிட்டில் வாஜ்பாய் மருத்துவக் கண்காணிப்பில் இருப்பதாக ஏஐஎம்எஸ் கண்காணிப்பாளர் மருத்துவர் D K ஷர்மா தெரிவித்துள்ளார்.

84 வயதாகும் வாஜ்பேயி உடன் அவருடைய பிரத்யேக மருத்துவர் ரந்தீப் குலேரியா மருத்துவ சோதனைகளில் ஈடுபட்டுள்ளார்.

பா ஜ க தலைவர்கள் மருத்துவமனைக்கு விரைந்துள்ளனர்.

தேர்தல் அரசியலில் பங்கு பெறுவதற்காக தமிழ்நாடு முஸ்லிம் முன்னேற்ற கழகம் தன் ஆதரவில் மனிதநேய மக்கள் கட்சி என்ற புதிய கட்சியை பிப்ரவரி 7ம் தேதி துவக்குகிறது. இதற்கான துவக்கவிழா தாம்பரத்தில் நடக்கிறது.

இதுகுறித்து தமுமுக தலைவர் ஜவாஹிருல்லா நிருபரிடம் கூறுகையில்,

தமுமுக ஆதரவுடன் மனிதநேய மக்கள் கட்சியின் துவக்க விழா மாநாடு 7ம் தேதி தாம்பரத்தில் நடக்கிறது. இக்கட்சி தேர்தல் ஆணையத்தில் பதிவு செய்யப்பட்ட அரசியல் கட்சியாக செயல்பட இருக்கிறது. துவக்க விழா மாநாட்டில் தமிழ்நாடு மற்றும் புதுச்சேரியில் இருந்து ஆயிரக்கணக்கானவர்கள் கலந்து கொள்வார்கள் என்று எதிர்பார்க்கப்படுகிறது.

கட்சியின் பொதுச் செயலாளராக அப்துல் சமது, பொருளாளராக ஹாரூன் ரஷீத் ஆகியோர் தேர்வு செய்யப்பட்டுள்ளனர். தமுமுக சமூக சேவை அமைப்பாக தொடர்ந்து செயல்படும்.

இது முஸ்லிம்களுக்கு மட்டுமின்றி பிற்படுத்தப்பட்ட, தாழ்த்தப்பட்ட, பழங்குடி மக்கள் என அனைத்து தரப்பு மக்களின் வளர்ச்சிக்கு பாடுபடும். இதில் முஸ்லிம்கள் மட்டுமின்றி அனைத்து தரப்பு மக்களும் உறுப்பினர்களாகவும், நிர்வாகிகளாகவும் செயல்படலாம்.

ராமநாதபுரம், வேலூர், நெல்லை, தஞ்சாவூர், மயிலாடுதுறை மற்றும் மத்திய சென்னை தொகுதிகளில் முஸ்லிம்கள் அதிகம் உள்ளனர். அவற்றில் எதாவது இரண்டு தொகுதியில் மனிதநேய மக்கள் கட்சி போட்டியிடும்

என்றார்.

இலங்கை அரசுக்குச் சொந்தமான ஸ்ரீலங்கன் ஏர்லைன்ஸ் நிறுவன கிளை அலுவலகம் திருச்சி நகரில் மத்திய பேருந்து நிலையம் அருகே உள்ள ஒரு ஹோட்டலில் செயற்பட்டு வருகிறது.

நேற்றுமாலைஸ்ரீலங்கன் ஏர்லைன்ஸ் அலுவலகத்திற்குச் சென்ற 10க்கும் மேற்பட்ட ஆட்கள் இலங்கை அரசுக்கும், ராணுவத்திற்கும் எதிராக கோஷமிட்டபடி தாக்குதலில் இறங்கினர்.

அலுவலக கண்ணாடி கதவுகள், விளம்பர போர்டுகளை தாக்கி சேதப்படுத்தினர். கதவுகளும் அடித்து நொறுக்கப்பட்டன. அலுவலகத்திற்குள் பணியில் இருந்த இரு ஊழியர்களும் அங்கிருந்து அலறி அடித்து ஓடினர். பின்னர் தாக்குதல் நடத்தியவர்கள் சென்று விட்டனர்.

காவல்துறையினர் இதுகுறித்து வழக்குப் பதிவு செய்து விசாரணை மேற்கொண்டுள்ளனர்.

நாளை தமிழகத்தில் பொது வேலை நிறுத்தம் மேற்கொள்ள இலங்கைத் தமிழர்கள் பாதுகாப்பு இயக்கம் அழைப்பு விடுத்துள்ளது.இலங்கை இனப்படுகொலையைக் கண்டித்தும், போர் நிறுத்தம் அமல்படுத்தப்பட வேண்டும் என்பது உள்ளிட்ட கோரிக்கைகளை வலியுறுத்தியும் இந்த முழுஅடைப்பு என்று கூறப்படுகிறது.

இந்தப் போராட்டத்திற்குத் தடை விதிக்க வேண்டும் என்று கோரி சென்னையைச் சேர்ந்த வழக்கறிஞர் சதீஷ் சரவணகுமார் என்பவர் உச்சநீதிமன்றத்தில் வழக்கு தொடர்ந்தார்.

உச்சநீதிமன்ற தீர்ப்புக்கு எதிராக தமிழ்நாட்டில் நாளை சில அரசியல் கட்சிகள் ஆதரவுடன் `முழுஅடைப்பு' நடத்தப் போவதாக அறிவிக்கப்பட்டு உள்ளது.

இதை உச்சநீதிமன்றம் சட்ட விரோதம் என அறிவித்து பந்துக்கு தடை விதிக்க வேண்டும் என்று தனதுமனுவில் கோரியிருந்தார்.

இன்று பிற்பகல் இந்த மனு தலைமை நீதிபதி கே.ஜி.பாலகிருஷ்ணன் தலைமையிலான பெஞ்ச் முன்பு விசாரணைக்கு வந்தது.அப்போது நீதிபதிகள் வேலை நிறுத்தத்திற்குத் தடை விதிக்க மறுத்து விட்டனர்.

நீதிபதிகள் அளித்த உத்தரவில், தமிழகத்தில் நடைபெறவுள்ள பந்த் தொடர்பாக எந்த தடை உத்தரவையும் பிறப்பிக்க முடியாது. இதில் நீதிமன்றம் என்ன செய்ய முடியும்.அவர்களின் உணர்வுகளை வெளிப்படுத்துவதற்கான உரிமை உள்ளதுஎன்று தெரிவித்துள்ளனர்.

இம்மனு மீதான அடுத்த கட்ட விசாரணை பிப்ரவரி 16ம் தேதிக்கு ஒத்தி வைக்கப்பட்டுள்ளதும் குறிப்பிடத்தக்கது.

இலங்கையுடனான ஐந்து ஒருநாள் ஆட்டங்கள் அடங்கிய தொடரில், மூன்றாவது ஒருநாள் போட்டியிலும் வெற்றி பெற்று தொடரை இந்தியா கைப்பற்றியது.

முதல் இரண்டு ஆட்டங்களை வென்ற உற்சாகத்தில் களம் இறங்கிய இந்திய அணி, துவக்கத்தில் கவுதம் கம்பீர் மற்றும் தெண்டுல்கர் இருவரின் முக்கிய விக்கட்டுகளை அடுத்தடுத்து இழந்து சரிவைச் சந்தித்த போதிலும் வீரேந்திர சேவாக் மற்றும் யுவராஜ் சிங்கின் அற்புதமான ஆட்டத்தால் இந்தியா 364 ரன்களை இலங்கைக்கு வெற்றி இலக்காக நிர்ணயித்தது.

வீரேந்திர சேவாக் மற்றும் யுவராஜ் சிங் இணைந்து 214 ரன்கள் குவித்தனர். வீரேந்திர சேவாக் 116 ரன்களும் யுவராஜ் சிங் 117 ரன்களும் எடுத்தனர். பின்னர் களம் இறங்கிய இலங்கை அணிக்கு எந்த ஒரு கட்டத்திலும் வெற்றிபெறுவதற்கான வாய்ப்பை வழங்காமல் இந்தியா ஆட்டம் முழுவதும் ஆதிக்கம் செலுத்தியது.

இறுதியில் 147 ரன்கள் வித்தியாசத்தில் இந்தியா வெற்றி பெற்றது. யுவராஜ் சிங் ஆட்ட நாயனாக தேர்வு செய்யப்பட்டார்.

'இந்தியாவில் ஏற்றுமதி சார்ந்த துறைகளில் பணி புரிவோரில் சுமார் 15 லட்சம் வேலை இழக்க நேரலாம்' என மத்திய வர்த்தகத்துறை செயலாளர் ஜி.கே.பிள்ளை ஒரு பேட்டியில் தெரிவித்தார்.

இந்தியாவிலிருந்து பெருமளவில் இறக்குமதி செய்யும் அமெரிக்கா மற்றும் ஐரோப்பிய நாடுகள் பொருளாதார நெருக்கடிகளை எதிர்நோக்குவதால் அந்நாடுகளிலிருந்து வரும் ஆர்டர்கள் வெகுவாக குறைந்துள்ளன. இதனால் இந்திய ஏற்றுமதித் துறை கடுமையாகப் பாதிக்கப் பட்டுள்ளது.

கடந்த ஆகஸ்ட் மாதத்திலிருந்து இன்றுவரை சுமார் 10 லட்சம் ஊழியர்கள் பாதிக்கப் பட்டிருக்கிறார்கள் என்று தெரிவித்த பிள்ளை, இதே நிலை தொடர்ந்தால் மார்ச் மாதத்திற்குள் மேலும் 5 லட்சம் ஊழியர்கள் வேலையை இழக்கக் கூடும் என்றும் கூறினார்.

ஜவுளி மற்றும் ஆபரணங்கள் தயாரிக்கும் தொழிலில் ஈடுபட்டிருக்கும் நிறுவனங்கள் வெகுவாக பாதிக்கப் படும் என்று அவற்றில் பல நிறுவனங்கள் மூடப்படும் சூழலும் உருவாகலாம் என்று அவர் அப்பேட்டியில் தெரிவித்தார்.

முல்லைத் தீவு அருகே உள்ள புதுக்குடியிருப்பில் உள்ள மருத்துவமனை மீது இலங்கை இராணுவம் மீண்டும் தாக்குதல் நடத்தி உள்ளது. இரண்டு நாட்களில் நடத்தப்பட்ட நான்காவது தாக்குதல் இது என்றும் இதுவரை மருத்துவ மனையில் நடத்தப்பட்ட தாக்குதல்களில் மட்டும் 12 பேர் கொல்லப் பட்டுள்ளதாகவும் 30க்கும் அதிகமானோர் காயமுற்றதாகவும் செஞ்சிலுவைச் சங்கம் கூறியுள்ளது.

இரான் முதன் முறையாக தன்னுடைய நாட்டில் தயாரான செயற்கைக் கோளை இன்று காலை விண்ணில் ஏவியது. ஒமிட் (நம்பிக்கை) என்று பெயரிடப் பட்டுள்ள இந்த செயற்கைக் கோள் சபீர் 2 என்ற உள்நாட்டில் தயாரான ஏவுகணை மூலம் விண்ணில் செலுத்தப்பட்டது.

உலகிலேயே மிகக் குறைந்த விலையில் மடிக்கணினி இன்று திருப்பதியில் அறிமுகப்படுத்தப் படுகிறது. இதன் விலை 10 அமெரிக்க டாலர்கள் (சுமார் 500 ரூபாய்) என்று கூறப்படுகிறது.

கர்நாடகா முதல்வர் எடியூரப்பாவின் மனைவி மைத்ரா தேவி கடந்த 2004-ம் ஆண்டு ஷிமோகா மாவட்டத்திலுள்ள அவரது வீட்டில் தண்ணீர் தொட்டி ஒன்றில் மர்மமான முறையில் இறந்து கிடந்தார். இது பற்றி அப்போது காவல்துறையினர் விசாரணை செய்து வழக்கையும் மூடி விட்டனர்.

ஷிமோகாவைச் சேர்ந்த ஆர் சேஷாத்ரி என்ற வழக்குரைஞர், இந்த வழக்கை மறுவிசாரணை செய்ய வேண்டும் என பொதுநல வழக்கு தொடுத்திருந்தார். அதைத் தொடர்ந்து இந்த வழக்கை மறு விசாரணை செய்யும்படி நீதிமன்றம் காவல்துறைக்கு உத்தரவு பிறப்பித்திருக்கிறது.

வழக்குரைஞர் சேஷாத்ரி, இந்த மரணம் ஒரு கொலை என்றும் உண்மைகள் மறைக்கப்பட்டு சாட்சியங்கள் திரிக்கப்பட்டிருக்கின்றன என்றும் கூறுகிறார். எடியூரப்பா, அவரது மகள், இரண்டு மகன்கள், பணியாளர்கள் அனைவரும் காவல் துறையினருக்குத் தவறான தகவல்களைத் தந்து திசை திருப்பி விட்டனர் என்றும் தெரிவிக்கிறார்.

முதல்வர் எடியூரப்பா இது பற்றி கருத்துத் தெரிவிக்க மறுத்து விட்டார்.

குஜராத்தில் நரேந்திர மோடியின் அமைச்சரவையில் அமைச்சராக இருப்பவரும் மற்றும் ஒரு மருத்துவரும் தலைமறைவாக இருப்பதாக கோத்ரா கலவரம் குறித்து விசாரித்து வரும் சிறப்பு புலணாய்வுக் குழு அறிவித்துள்ளது.

சென்ற ஞாயிறு மாலை கோவாவிலிருந்து புதுடில்லி வந்துக் கொண்டிருந்த விமானத்தை ஒரு கும்பல் கடத்த முயல்வதாக விமானி தெரிவித்ததைத் தொடர்ந்து டில்லி விமான நிலையத்தில் பரபரப்பு ஏற்பட்டது.

5.29 மணியளவில் விமானம் அவசரமாகத் தரையிறக்கப் பட்டு ஒதுக்குப் புறமான ஒரு இடத்தில் நிறுத்தி வைக்கப் பட்டது. முன்னெச்சரிக்கை ஏற்பாடுகள் முடுக்கி விடப்பட்டன. விமானத்தைச் சுற்றி கமாண்டோக்கள் நிறுத்தி வைக்கப் பட்டனர். பிறகு பயணிகளை பத்திரமாக வெளியேற்ற முடிவு செய்யப் பட்டது. 8:30 மணியளவில் கமாண்டோக்களின் பாதுகாப்போடு பயணிகள் அனைவரும் பத்திரமாக வெளியேற்றப் பட்டனர்.

இச்சம்பவம் தொடர்பாக ஜிதேந்திரா என்பவரை காவல்துறையினர் கைது செய்துள்ளனர். சமீர், ஹர்ப்ரீத் என்ற மேலும் இருவரும் கைது செய்யப்பட்டு விசாரணைக்கு பிறகு விடுவிக்கப் பட்டனர்.

சீன அதிபர் வென் ஜியாபோவின் இங்கிலாந்து சுற்றுப் பயணத்தின் ஒரு அங்கமாக கேம்பிரிட்ஜ் பல்கலைக்கழகத்தில் அவர் உரை நிகழ்த்திக் கொண்டிருந்தபோது பார்வையாளர்களுள் ஒருவர் அதிபரை நோக்கி தம் காலணியை கழற்றி வீசினார். இதனால் அவையில் பரபரப்பு ஏற்பட்டது.

சீன அதிபர் உலகமயமாதலில் சீனாவின் பங்கு பற்றி உரையாற்றிக் கொண்டிருந்தபோது இச்சமபவம் நிகழ்ந்தது. ஐரோப்பியரைப் போல தோற்றம் கொண்ட ஒரு நபர் எழுந்து, 'இந்தச் சர்வாதிகாரி சொல்லும் பொய்களை உங்களால் எப்படி கேட்டுக் கொண்டிருக்க முடிகிறது? இதை நீங்கள் எதிர்த்துக் கேட்க வேண்டாமா?' என பார்வையாளர்களை நோக்கி கூச்சலிட்ட வண்ணம் தனது காலணியைக் கழற்றி அதிபரை நோக்கி வீசினார். அது குறி தவறி மேடையில் அதிபரின் ஒரு கஜ தூரத்தில் விழுந்தது.

கேம்பிரிட்ஜ் நகர காவல்துறையினர் 27 வயதான அந்த நபரை கைது செய்து விசாரணை செய்து வருகின்றனர்.

சிறுநீரக தானம் உடல்நலனைப் பாதிக்காது என்று மின்னசோட்டா பல்கலைக்கழகத்தில் மேற்கொள்ளப்பட்ட ஆய்வில் தெரியவந்துள்ளது. ஒரு சிறுநீரகத்தை தானமளித்தவர்களும் இரு சிறுநீரகம் உடைய மற்றவர்களைப் போலவே வாழ்வைத் தொடரலாம் என்று இந்த ஆய்வு தெரிவிக்கிறது.

சிறுநீரகக்கோளாறுகள், உயர் இரத்த அழுத்தம், நீரிழிவு, மற்றும் புற்றுநோய்க்கான வாய்ப்புகள் சிறுநீரகதானத்தின் காரணமாக அதிகப்படுவதில்லை என்றும், வயது, பாலினம், பரம்பரை உள்ளிட்ட நோய்வாய்க்காரணிகளில் சிறுநீரகத்தானம் செய்தவர், செய்யாதவர் என்ற பாகுபாடு பாரிய வேறுபாட்டை ஏற்படுத்துவதில்லை என்றும் கண்டறியப்பட்டுள்ளது.

இத்தகவலை பல்கலை.மருத்துவர் ஹசன் இப்ராஹிம் வெளியிட்டுள்ளார். "60 விழுக்காடு சிறுநீரக தானமளித்தவர்களின் உடல் மற்றும் மன ஆரோக்கிய நிலைகள் சாதாரண பொதுமக்களின் நிலைகளை விடவும் தாழ்ந்துவிடவில்லை" மற்றவர்களைப் போன்ற இயல்பான வாழ்வை தானமளித்தவர்கள் தொடர்வதில் எந்தத் தடையுமில்லை" - என்கிறார் மருத்துவர் இப்ராஹிம்.

இலங்கைப் பிரச்சினை தமிழகத்தில் விஸ்வரூபம் எடுத்துள்ளநிலையில் தி மு க செயற்குழு நாளை கூடுகிறது.

உடனடியாக போர் நிறுத்தம் அமல்படுத்தப்பட வேண்டும் என தமிழக சட்டசபையில் இருமுறை தீர்மானம் நிறைவேற்றப்பட்டது. கடந்த முறை நிறைவேற்றப்பட்ட தீர்மானத்தை மத்திய அரசுக்கு இறுதி வேண்டுகோள் என முதல்வர் கருணாநிதி தெரிவித்திருந்தார்.

இதற்கும் மத்திய அரசு செவி சாய்க்காவிட்டால், திமுக செயற்குழுவைக் கூட்டி முக்கிய முடிவு எடுக்கப்படும் என அவர் தெரிவித்திருந்தார்.

இந் நிலையில் நாளை கூடும் திமுக செயற்குழுக்கூட்டத்தில் முதல்வர் கருணாநிதியும் பங்கேற்கிறார். கடந்த சில நாட்களாக உடல் நலக்குறைவால் அவர் மருத்துவமனையில் ஓய்வெடுத்து வருகிறார்.ஓய்வு கட்டாயம் தேவை என டாக்டர்கள் வலியுறுத்தியுள்ள போதிலும், நாளைய கூட்டத்திற்கு அவர் தலைமை வகிப்பார் என தெரிகிறது.

நாளை இலங்கை விவகாரம் தொடர்பாக முக்கிய முடிவு எடுக்கப்படலாம் என ஊடக உலகில் எதிர்பார்க்கப்படுகிறது.

தருமபுரி மாவட்டம் அரூர் அருகே உள்ளது கடம்பர அள்ளி கிராமத்தைச் சேர்ந்தவர் வெண்ணிலா. இவருக்கு 16 வயது. திப்பம்பட்டி அரசினர் பள்ளியில் 10 -ஆம் வகுப்பு படித்து வருகிறார்.

இவருக்கும், பேதாதம்பட்டியைச் சேர்ந்த துரைவளவன் என்பவருக்கும் நேற்று பேதாதம்பட்டி மணமகன் வீட்டில் திருமணம் நடைபெறுவதாக இருந்தது.

இது குறித்து மாவட்ட கலெக்டர் அமுதாவுக்கு தகவல் கிடைத்து. அரசின் சட்டவிதிகளுட்பட்டு மணப்பெண்ணின் வயது ஆகவில்லை என்ற குற்றச்சாட்டினை
யடுத்து மாவட்ட கலெக்டர் அமுதா, இளம் பெண் வெண்ணிலாவின் திருமணத்தை தடுத்து நிறுத்த அரூர் டிஎஸ்பி மோகனுக்கு உத்தரவிட்டார்.

இதன் பேரில் மணமகன் மற்றும் மணமகள் வீட்டாரிடம் பேசிய போலீசார் வெண்ணிலாவின் பால்ய திருமணம் சட்ட விரோதமானது எனக் கூறி அந்த திருமணத்தை தடுத்து நிறுத்தினர்.

இந்திய தேர்தல் ஆணையர் நவீன் சாவ்லாவை நீக்கக் கோரி தலைமைத் தேர்தல் ஆணையர் கோபால் சாமி குடியரசுத் தலைவர் பிரதீபா பட்டீலுக்கு பரிந்துரைக் கடிதம் எழுதியிருந்தார். தலைமைத் தேர்தல் ஆணையரின் பதவிக்காலம் முடிவதற்கு இரண்டு மாதங்களும் நாடாளுமன்றத் தேர்தலுக்கு அதே அளவு நாட்களும் மீதம் உள்ள நிலையில் கோபால்சாமியின் இக்கடிதம் அரசியல் வட்டாரத்தில் பெரும் சர்ச்சையைக் கிளப்பியது. இந்நிலையில் இப்பரிந்துரைக் கடிதத்தை அரசு இன்று நிராகரித்துள்ளது. இதன் மூலம் அடுத்த தலைமைத் தேர்தல் ஆணையராக நவீன் சாவ்லா பதவியேற்பது கிட்டத்தட்ட உறுதியாகி உள்ளது.

இலங்கையில் தமிழர்கள் தாக்கப்படுவதைக் கண்டித்தும், இந்திய அரசு இப்பிரச்சனையில் தலையிட்டு தீர்வு காணவேண்டும் என வலியுறுத்தி தமிழகம் மற்றும் புதுவையில் பல்வேறு அமைப்புகளும் போராடி வருகின்றன. பள்ளி மற்றும் கல்லூரி மாணவர்களும் போராட்டத்தில் இறங்கி உள்ளதால் போராட்டம் தீவிரமடைந்து வருகிறது. இதனைத் தவிர்க்கும் நோக்கில் நேற்று தமிழகத்தில் பள்ளி, கல்லூரி மற்றும் விடுதிகள் அனைத்தும் காலவரையறையின்றி மூட அரசு உத்தரவிட்டது.

கோவாவிலிருந்து டில்லியை நோக்கிப் புறப்பட்ட விமானம், புறப்பட்ட சில நிமிடங்களில் அவசரம் அவசரமாக தரையிறக்கப்பட்டது. விமானத்தைச் சிலர் கடத்த முயல்கின்றனர் என்றச் சந்தேகம் எழுந்ததைத் தொடர்ந்து விமானி கட்டுப்பாட்டு அறைக்குக் கொடுத்தத் தகவலின் பேரில் உடனடியாக தரை இறக்கப்பட்டது.

விமானத்தைக் கடத்த முயன்றதாக சந்தேகத்தின் பேரில் மூன்று பேர் கைது செய்யப்பட்டனர்.

கென்யாவில் கவிழ்ந்து விழுந்த எண்ணெய் லாரி ஒன்று எதிர்பாராத விதமாக வெடித்துச் சிதறியதில் 111 பேர் பரிதாபமாக உயிரிழந்தனர். சாலையோரமாக கவிழ்ந்து விழுந்துக் கிடந்த லாரியிலிருந்து வெளியே ஒழுகிக் கொண்டிருந்த எண்ணெயை அப்பகுதி மக்கள் போட்டியிட்டுச் சேகரித்துக் கொண்டிருந்தனர். எதிர்பாராத விதமாக எண்ணெய் லாரி வெடித்துச் சிதறியதில் சுற்றி நின்றிருந்த மக்களில் சுமார் 111 பேர் உயிரிழந்தனர். நூற்றுக்கு மேற்பட்டோருக்குப் பலத்த காயம் ஏற்பட்டது.

அமெரிக்காவுக்கு சாதகமான ஒருங்கிணைந்த ஆப்கானிஸ்தானை உருவாக்க முடியாது என அமெரிக்காவின் முன்னணி உளவு மற்றும் ஆய்வு நிறுவனம் எச்சரித்துள்ளதாக தகவல்கள் கூறுகின்றன.

சர்ச் இஞ்சின் ஜாம்பவனான கூகுள் தளத்தில் இன்று தொழில் நுட்பக் கோளாறு ஏற்பட்டது. இதன் மூலம் தேடிய சர்ச் ரிஸல்ட் பக்கத்தில் பயனர் எவருக்கும் பயன் இல்லாத வகையில் அனைத்துத் தளங்களும் ஆபத்தானவை என்ற அறிவிப்பை வெளியிட்டது கூகுள். இதனால் எந்த ஒரு பயனரும் தனது தேடுதல் மூலம் தளங்களுக்குச் செல்ல இயலவில்லை. இந்த தொழில் நுட்பக் கோளாறு 40 நிமிடங்கள் வரை நீடித்தது.

இணைய உலகின் மிகப் புகழ் பெற்ற கூகுள் தளத்தில் ஏற்பட்ட அதிர்ச்சிகரமான இந்த தொழில்நுட்பக் கோளாறில் கூகுள்.காம் தளம் கூட ஆபத்தானது என்ற அறிக்கையிலிருந்து தப்பவில்லை. (படம்)

இத் தவறு ஏற்பட்டது எப்படி?

பிரவுஸிங் செய்பவர்களின் கம்ப்யூட்டர்களில் வைரஸ் போன்ற மென்பொருளைக் கொண்டு ஆபத்தினை விளைவிக்கும் தளங்களைக் கண்டறிந்து தகவல் கொடுக்க இது நாள் வரை கூகுள், stopbadware.org என்ற தளத்தின் உதவியை நாடி வந்தது.

அந்த தளம் தந்த தகவலின் அடிப்படையிலேயே இதுநாள் வரை பயனர்களுக்கு இத்தகவலை அளித்து வந்தது.

இன்று காலை இந்தத் தகவல் களஞ்சியத்தை கூகுள் தளத்தில் அப்டேட் செய்கையில் தவறுதலாக உலகின் அனைத்து இணையத் தளங்களும் ஆபத்தானவை என்ற தகவல் பதியப் பட்டு விட்டது.

கூகுள் நிறுவனத்தின் துணைத் தலைவரான மரிஸா மேயர், இந்தத் தவறுக்கு வருத்தம் தெரிவித்துள்ளதோடு இது மனித உழைப்பில் தகவலை உள்ளீடு செய்வதால் ஏற்பட்டக் கோளாறு என்று கூறியுள்ளார்.

தமிழகத்தில் உள்ள தனியார் மற்றும் அரசு பள்ளி, கல்லூரி மற்றும் கல்லூரி விடுதிகளை காலவரையறை இன்றி மூட தமிழக அரசு உத்தரவிட்டுள்ளது.