Inneram.com

பாண்டிச்சேரியில் கட்டப்பட்டு வரும் விமான நிலையம் எதிர்பார்த்தபடி வரும் மார்ச் மாதம் செயற்படாமல் போகலாம் என்றும் அது செயல்பட இன்னும் ஒரு வருடம் ஆகலாம் என்றும் தெரிகிறது. இத்தகவலை துணைநிலை ஆளுநர் கோவிந்த்சிங் குர்ஜார் செய்தியாளர்களிடம் தெரிவித்துள்ளார்.

வேலைகள் இன்னும் முடிவடையாமல் இருப்பதே இதற்கு காரணம் என்று தெரிகிறது. ஓடுபாதையையொட்டி கட்டப்பட்டிருக்கும் பாதாள சாக்கடையில் கசிவு ஏற்பட்டு, அது வெளியில் வருவதால் அதனை சரி செய்ய வேண்டியிருக்கிறது என்றும் கிங்ஃபிசர் உள்ளிட்ட நிறுவனங்கள் பாண்டிச்சேரியில் சேவை தொடங்க ஆர்வமாக இருப்பதாகவும் தெரியவ்ருகிறது.

ஜம்மு கஷ்மீர் மாநிலத்தில் பன்னாட்டு விமான நிலையம் நேற்று முறைப்படி துவக்கி வைக்கப்பட்டது. காங்கிரஸ் கட்சியின் தலைவர் சோனியா காந்தி இந்த முனையத்தில் விமான சேவையைத் துவக்கி வைத்தார். முதல் சேவையாக ஸ்ரீநகரிலிருந்து துபாய்க்கு ஏர் இந்திய விமானம் தனது பயணத்தைத் துவக்கியது.

மாதம் ரூ. 4.30 இலட்சம் சம்பளம் பெற்றுக்கொண்டிருந்த தனது விமானிகள் அனைவருக்கும் ரூ.80,000/= குறைவு செய்து கிங்ஃபிஷர் விமான நிறுவனம் அறிவித்துள்ளது.

டெக்கான் ஏர்வேய்ஸ் நிறுவனத்தை தன்னுடன் இணைத்துக்கொண்ட கிங்ஃபிஷர் நிறுவனம், டெக்கான் நிறுவன விமானிகள் பெற்ற சம்பள விகிதத்துடன் சமப்படுத்துவதற்காக தனது விமானிகளுக்கும் சம்பளக் குறைப்பு முடிவை எட்டியதாக நிறுவன அதிகாரி ஒருவர் தெரிவித்துள்ளார்.

இம்முடிவு விமானிகளிடையே கடும் அதிருப்தியை ஏற்படுத்தியிருப்பதாகவும், 600 விமானிகளை உறுப்பினர்களாகக் கொண்ட அமைப்பொன்று நீதிமன்றத்தை நாடவிருப்பதாகவும் செய்திகள் தெரிவிக்கின்றன.