Inneram.com

பிரிட்டன் மற்றும் பிரான்சைச் சேர்ந்த அணுஆயுத நீர்மூழ்கிக் கப்பல்கள் அட்லாண்டிக் பெருங்கடலின் அடியில் ரோந்துப் பணியில் ஈடுபட்டிருந்த போது மோதிக் கொண்ட செய்தி வெளியாகியுள்ளது.

பிரிட்டனைச் சேர்ந்த எச் எம் எஸ் வேன்கார்டு என்ற அணு ஆயுத நீர்மூழ்கியும், பிரான்சைச் சேர்ந்த லா டிரையம்ஃபண்ட் என்ற இன்னொரு அணு ஆயுத நீர்மூழ்கியும் அட்லாண்டிக் பெருங்கடலுக்கடியில் இம்மாதத் தொடக்கத்தில் ரோந்துப் பணியில் ஈடுபட்டிருந்த போது மிகக் கடுமையான அளவில் கடலுக்கடியிலேயே மோதிக் கொண்டதாக இவ்விரு நாடுகளின் பாதுகாப்பு அமைச்சக செய்திக்குறிப்புகள் தெரிவித்துள்ளன.

கடலுக்கடியிலிருந்து வரும் தாக்குதல்களைச் சமாளிக்க இவை பயன்படுத்தப் படுவதாக அச்செய்திக் குறிப்புகளில் கூறப்பட்டுள்ளது. இவ்விரு நீர்மூழ்கிகளும் பெருமளவு அணு ஆயுதங்களுடன் நிரப்பட்டிருந்ததாகவும், பெரும் சேதங்கள் ஏதும் நிகழவில்லை என்றும் இச்செய்திக் குறிப்புகள் தெரிவிக்கின்றன.

சோனார் போன்ற அதிநவீனப் புலனறியும் கருவிகள் பொருத்தப் பட்டிருந்த போதிலும் இவ்வகை மோதல் எவ்வாறு ஏற்பட்டது என்பதற்கு இரு அரசுகளும் எவ்விதக் கருத்தும் தெரிவிக்கவில்லை.

இந்த மோதலால் அட்லாண்டிக் கடலின் கடும் சுற்றுப்புறச் சீர்கேடு நடந்திருக்கும் என அஞ்சுவதாக அணு ஆயுதங்களுக்கு எதிரான தன்னார்வு நிறுவனம் CND (Campain for Nuclear Disarmament) கவலை தெரிவித்துள்ளது. சேதத்தின் உண்மையான விபரங்களை வெளியிடுமாறு பிரிட்டன், பிரான்சு அரசுகளை அவ்வமைப்பு கேட்டுக் கொண்டுள்ளது.

சீன அதிபர் வென் ஜியாபோவின் இங்கிலாந்து சுற்றுப் பயணத்தின் ஒரு அங்கமாக கேம்பிரிட்ஜ் பல்கலைக்கழகத்தில் அவர் உரை நிகழ்த்திக் கொண்டிருந்தபோது பார்வையாளர்களுள் ஒருவர் அதிபரை நோக்கி தம் காலணியை கழற்றி வீசினார். இதனால் அவையில் பரபரப்பு ஏற்பட்டது.

சீன அதிபர் உலகமயமாதலில் சீனாவின் பங்கு பற்றி உரையாற்றிக் கொண்டிருந்தபோது இச்சமபவம் நிகழ்ந்தது. ஐரோப்பியரைப் போல தோற்றம் கொண்ட ஒரு நபர் எழுந்து, 'இந்தச் சர்வாதிகாரி சொல்லும் பொய்களை உங்களால் எப்படி கேட்டுக் கொண்டிருக்க முடிகிறது? இதை நீங்கள் எதிர்த்துக் கேட்க வேண்டாமா?' என பார்வையாளர்களை நோக்கி கூச்சலிட்ட வண்ணம் தனது காலணியைக் கழற்றி அதிபரை நோக்கி வீசினார். அது குறி தவறி மேடையில் அதிபரின் ஒரு கஜ தூரத்தில் விழுந்தது.

கேம்பிரிட்ஜ் நகர காவல்துறையினர் 27 வயதான அந்த நபரை கைது செய்து விசாரணை செய்து வருகின்றனர்.

கஞ்சா பயன்படுத்துதல் தண்டனைக்குரிய குற்றம் என மீண்டும் பிரிட்டிஷ் அரசு அறிவித்துள்ளது. பிரிட்டனில் போதை அளிக்கும் வேதிப் பொருட்களை வகைப்படுத்தும் பிரிவில் முன்னதாக கஞ்சா B பிரிவு வேதிப்பொருள் என அறிவிக்கப்பட்டிருந்தது. டோனி பிளேய்ர் பிரதமராக இருந்த போது 2004 ஆம் ஆண்டு கஞ்சா C பிரிவில் நகர்த்தப்பட்டது.

பிரிட்டனின் சட்டப்படி C பிரிவு போதை மருந்துகளை வைத்திருப்பவரை சட்டம் ஒழுங்கு காவலர்கள் அறிவுறுத்த மட்டுமே முடியும். அவர்கள்மீது வழக்குத் தொடுக்கவோ தண்டனை பெற்றுத் தரவோ இயலாது.

தற்போது கஞ்சா B பிரிவு வேதிப் பொருள் என அறிவிக்கப்பட்டிருப்பதால் கஞ்சாவை வைத்திருப்பதோ பயன்படுத்துதலோ குற்றம் என்ற பிரிவில் அடங்கும். கஞ்சாவின் புழக்கம் பிரிட்டிஷ் சமூகத்தில் பெருமளவு அதிகரித்துவிட்டதால் கார்டன் பிரவுன் இந்த அறிவிப்பை அளிக்கப் பரிந்துரை செய்தார்.

இதன்படி முதல்முறை விதி மீறுவோருக்கு எச்சரிக்கையும், அவரே இரண்டாம் முறை பிடிபட்டால் 80 பவுண்டு அபராதமும், மூன்றாம் முறை பிடிபட்டால் சிறைத் தண்டனையும் அளிக்க்கப்படும்.