Inneram.com

தமிழக உயர்நீதிமன்ற தலைமை நீதிபதியாக இருந்த ஏ.பி.ஷா டெல்லி உயர்நீதிமன்ற தலைமை நீதிபதியாக இடமாற்றம் செய்யப்பட்டார். தற்போது, தற்காலிக தலைமை நீதிபதியாக முகோபாதயா செயல்பட்டு வருகிறார். அலகாபாத் தலைமை நீதிபதியாக பணியாற்றிவரும் எச்.எல்.கோகலேவை சென்னை உயர்நீதிமன்றத் தலைமை நீதிபதியாக நியமிக்க மத்திய அரசு முடிவெடுத்தது.இதற்கு குடியரசுத்தலைவர் பிரதீபா பாட்டீல் ஒப்புதல் அளித்துவிட்டார்.

மும்பை நீதிமன்றத்தைல் 1994ம் ஆண்டு கூடுதல் நீதிபதியாக நியமிக்கப்பட்ட கோகலே, பின்னர் அலகாபாத் உயர்நீதிமன்றத்துக்கு இடமாற்றம் செய்யப்பட்டார். 1995ம் ஆண்டு நிரந்தர நீதிபதியாக நியமிக்கப்பட்டு, மும்பை உயர்நீதிமன்றத்துக்கே மீண்டும் மாற்றப்பட்டார்.
அலகாபாத் உயர்நீதிமன்ற தலைமை நீதிபதியாக, 2007ம் ஆண்டு மார்ச் 7ம் தேதி நியமிக்கப்பட்டார். இப்போது சென்னை உயர்நீதிமன்றத் தலைமைக்கு மாற்றப்பட்டுள்ளார்.

மேலும் சில மாநில உயர்நீதிமன்றங்களிலும் தலைமை மாற்றம் இருக்கும் எனத் தெரியவருகிறது

அலிகர் நீதிமன்ற வளாகத்தில் விசாரணைக்காக முன்னிலைப்படுத்தப்பட்ட இரு கைதிகளை கூலிப்படையைச் சேர்ந்த மூவர் துப்பாக்கியால் சுட்டுக்கொன்றனர்.

இதையடுத்து பணியிலிருந்த காவலர்கள் திருப்பிச் சுட்டதில் அந்த மூன்று கொலையாளிகளும் செத்து வீழ்ந்தனர்.

நீதிமன்ற வளாகத்திலேயே நடந்த இந்த துப்பாக்கிச் சூட்டால், கொலைகளால், நகரில் பதற்றம் நிலவுகிறது.

பீகாரில் புத்தா மிஷன் பல் மருத்துவக் கல்லூரி & மருத்துவமனை என்ற நிறுவனமொன்று பல்மருத்துவப் படிப்புக்காக விளம்பரம் செய்தது. அதில் தங்களது கல்லூரி மகத் பல்கலைக்கழக இணைப்பு பெற்றுள்ளதாகவும், இந்திய பல்மருத்துவக் குழுமம் (Indian Dental Council) அக்கல்லூரி படிப்புகளை அங்கிகரித்திருப்பதாகவும் கூறியிருந்தது. அதை நம்பி ஏராளமானவர்கள் அக்கல்லூரியில் சேர்ந்தனர்.

கல்லூரியினர் பொய்யான விளம்பரம் செய்து தங்களுக்கு பாதிப்பு ஏற்படுத்திவிட்டதாக பாதிக்கப்பட்ட 11 மாணவர்கள் உச்சநீதிமன்றத்தில் வழக்குத் தொடர்ந்தனர்.

மாணவர்களை கல்லூரிநிர்வாகம் ஏமாற்றியது நிரூபிக்கப்பட்டதால் அக்கல்லூரி நிர்வாகம் தலா இரண்டு இலட்சம் வீதம் 22 இலட்சம் அபராதம் வழங்க உச்சநீதிமன்ற நீதிபதிகள் உத்தரவிட்டனர். மேலும், மாணவர்களை கல்வியின் பெயரால் ஏமாற்றும் நிறுவனங்களுக்கு எதிராக நுகர்வோர் நலவழக்கு தொடுக்கலாம் என்றும் உச்சநீதிமன்றம் ஆலோசனை கூறியுள்ளது.

விஞ்ஞானிகள் அடங்கிய குழுவொன்றை ஏற்படுத்தி கடல்நீரை குடிநீராக மாற்றும் அதிக செலவற்ற தொழில்நுட்பத்தை கண்டறிய அரசு முயல வேண்டும் என்று உச்சநீதிமன்றம் கருத்து தெரிவித்துள்ளது. தண்ணீர் பிரசினை தீர்க்கப்படாவிட்டால் சமூகத்தில் அமைதியின்மை நிலவும் என்று கவலையும் தெரிவித்துள்ளது.

வழக்கு ஒன்றின் தொடர்பாக கருத்து தெரிவித்த உச்சநீதிமன்ற நீதிபதிகள் மார்க்கண்டேய கட்ஜு, அல்தாமஸ் கபீர் ஆகியோர் அடங்கிய குழு

"நாட்டில் தண்ணீர் பிரசினையை தீர்க்கவேண்டியது மிகவும் இன்றியமையாதது. சிறந்த விஞ்ஞானிகள் அடங்கிய குழு ஒன்றை மத்திய அரசு ஏற்படுத்த வேண்டும். நிர்வாகரீதியாக நிதி மற்றும் தொழில்நுட்ப உதவிகளை மாநில அரசுகள் செய்து தரவேண்டும். நாட்டின் குடிநீர் பிரசினையைத் தீர்க்க கடல்நீரை குடிநீராக மாற்றும் செலவற்ற தொழில்நுட்பத்தை கண்டறிய அவர்களை கேட்டுக்கொள்ள வேண்டும். வெளிநாட்டு வாழ் இந்திய விஞ்ஞானிகள், வெளிநாட்டு நிபுணர்களின் உதவியையும் தேவைக்கேற்ப பெறலாம். தண்ணீர் பிரசினையால் மாநிலங்களுக்கிடையேயும் மோதல்கள் ஏற்படுவதால் ஒருநாள் கூட தாமதமின்றி அரசு இதில் முனைப்பு காட்ட வேண்டும்"

என்று கூறியுள்ளனர்.