உலகக் கோப்பை "கிக் பாக்ஸிங்': சாதனை படைத்த ராமநாதபுரம் மாணவர்கள்

www.muduvaivision.com


ராமநாதபுரம், பிப். 11: சேலத்தில் நடைபெற்ற உலகக் கோப்பை -2009-க்கான கிக் பாக்ஸிங் போட்டியில், ராமநாதபுரம் பள்ளி மாணவர்கள் சாதனை படைத்துள்ளனர்.

சேலம் மகாத்மா காந்தி விளையாட்டு அரங்கில் நடைபெற்ற இந்தப் போட்டியில், உலக அளவில் இத்தாலி, இங்கிலாந்து, அமெரிக்கா, கொரியா, ஈரான் மற்றும் இந்தியா உள்ளிட்ட நாடுகளைச் சேர்ந்த பள்ளி, கல்லூரி மாணவர்கள் பலர் கலந்துகொண்டனர்.

இதில், சப்-ஜூனியர் 10 வயதுக்கான 20 முதல் 25 கிலோ எடைப் பிரிவு கிக் பாக்ஸிங் தொடர் சண்டைப் போட்டியில் பங்கேற்ற ராமநாதபுரம் மன்னர் சேதுபதி மெட்ரிக். பள்ளி மாணவர் ராகுல் பாபு முதல் இடத்தைப் பிடித்து தங்கப் பதக்கம் வென்றார்.

மேலும் அதே போட்டியில், 16 வயதினருக்கான ஜூனியர் 40 முதல் 45 கிலோ எடைப் பிரிவில், ராமநாதபுரம் லூயிஸ் லெவேல் மெட்ரிக். உயர்நிலைப் பள்ளி மாணவர் மருதுபாண்டி 2-வது இடத்தைப் பிடித்து வெள்ளிப் பதக்கம் பெற்றார்.

45 முதல் 50 கிலோ எடைப் பிரிவுக்கான கிக் பாக்ஸிங் தொடர் சண்டைப் போட்டியில், கீழக்கரை முகம்மது சதக் பாலிடெக்னிக் கல்லூரி மாணவர் முஹம்மது பாஸில் 2-வது இடத்தைப் பிடித்து, வெள்ளிப் பதக்கத்தைப் பெற்றார்.

இப் போட்டிகளில் கலந்துகொண்டு வெற்றிபெற்ற மாணவர்களை, மாவட்ட கிக் பாக்ஸிங் சங்கத் தலைவர் மன்னர் குமரன் சேதுபதி, செயலர் செல்லத்துரை அப்துல்லா, மாவட்டத் தலைமைப் பயிற்சியாளர் குகன் ஆகியோர் பாராட்டினர்.