உலகெங்கும் உள்ள வாடிக்கையாளர்கள் தங்கள் கோப்புகளைச் சேமித்துக் கொள்ளும் சேவையான யாஹூ கைப்பெட்டி (Yahoo! Breifcase) சேவையை நிறுத்த முடிவு செய்துள்ளது. இலவசமாகவும் கட்டணம் பெற்றும் இச்சேவையை வழங்கி வந்த யாஹூ நிறுவனம் வரும் மார்ச்சு மாதம் 30ஆம் நாளுடன் இந்தச் சேவையை முடிவுக்குக் கொண்டுவர இருப்பதாகவும், அதற்கு முன் வாடிக்கையாளர்கள் தங்கள் கோப்புகளைத் தரவிறக்கம் செய்து கொள்ளக் கோரியும் வாடிக்கையாளர்களுக்கு மின் அஞ்சல்களை அனுப்பி உள்ளது.

கட்டணம் செலுத்தி இச்சேவையைப் பெற்றவர்கள் தங்கள் கணக்குகளைச் சரிபார்த்துக் கொள்ளுமாறும், மிகுதியாகச் செலுத்தப் பட்டிருந்தால் திருப்பித் தரப்படும் என்றும் கூறியுள்ளது.

யாஹூ மின் அஞ்சல் சேவை எல்லையற்ற சேமிப்பு வசதியைத் தருவதாலும் Flickr போட்டோ மற்றும் வீடியோ சேமிப்பு வசதிகளைத் தருவதாலும் கைப்பெட்டிச் சேவை நிறுத்தப்படுவதாக அறிவித்துள்ளது.