நாடாளுமன்றத் தேர்தலுக்கு சில மாதங்களே இருப்பதால் நாடாளு மன்றத் தேர்தல் முயற்சிகளில் பல்வேறு அரசியல் கட்சிகளும் இறங்கியுள்ளன. காங்கிரஸ் கட்சியின் காரியக் கமிட்டி கூட்டம் இன்று அதன் தலைவர் சோனியா காந்தியின் வீட்டில் நடைபெற்றது. கூட்டம் முடிந்த பின்னர் செய்தியளார்களிடம் பேசிய காங்கிரஸ் பொதுச் செயலாளர் ஜனார்தன் திவேதி, காங்கிரஸ் கட்சி தேசிய அளவில் கூட்டணி அமைக்காது என்றும் மாநில அளவில் பல்வேறு மாநிலக் கட்சிகளுடனும் தொகுதி உடன்பாடு மற்றும் கூட்டணி அமைக்கும் என்றும் கூறினார்.

கூட்டணி என்பது எண்ணிக்கையைப் பொறுத்தது என்றும், தேர்தலில் பெறும் தொகுதிகளின் எண்ணிக்கை படி தேர்தலுக்குப் பிறகே தெரியவரும் வரும் என்றும் அவர் கூறினார்.

ஐக்கிய முற்போக்குக் கூட்டணி உள்ளதே என்று செய்தியாளர்கள் எழுப்பிய கேள்விக்கு, ஐக்கிய முற்போக்கு கூட்டணி இருக்கிறது உண்மைதான.. ஆனால் அது தேர்தலில் போட்டியிடவில்லை என்றார்.

ஒவ்வொரு மாநிலத்திலும் நிலவும் அரசியல் சூழ்நிலைகளுக்கு ஏற்ப அந்தந்த மாநிலத் தலைவர்களுடன் கலந்து மாநில அளவில் உடன்பாடுகள் எட்டப்படும் என்றும் அவர் கூறினார்.