பாகிஸ்தானின் வடமேற்குப் பிரதேசத்தில் புனெர் என்ற நகரில் வெடித்த சக்தி வாய்ந்த கார் வெடிகுண்டு 36 பேரை பலி வாங்கியிருக்கிறது. மேலும் 15 பேர் கடும் காயத்திற்கு ஆளாகியுள்ளனர். பாராளுமன்ற இடைத்தேர்தலில் வாக்களிப்பதற்காக பள்ளி ஒன்றில் பொதுமக்கள் கூடியிருந்தபோது குண்டு வெடித்தது.

குண்டு வெடிப்பின் விளைவாக பள்ளிக் கட்டிடம் முழுதுமாக இடிந்து விழுந்தது. அருகிலிருந்த ஒரு சந்தையின் கூரை சரிந்து விழுந்ததுடன் அருகாமையிலிருந்த பல வீடுகளும் கட்டிடங்களும் சேதமடைந்தன. இடிபாடுகளுக்கிடையே பாதிக்கப்பட்டவர்களைத் தேடும் பணி தொடர்ந்து நடந்துக் கொண்டிருக்கிறது.

தற்கொலைத் தாக்குதல் என்று நம்பப்படும் இந்தக் குண்டு வெடிப்பிற்கு இதுவரை எந்த அமைப்பும் பொறுப்பேற்கவில்லை. பாகிஸ்தானில் கடந்த 18 மாதங்களாக தொடர்ந்து நடக்கும் பல்வேறு தாக்குதல்களில் சுமார் 1500 பேர் உயிரிழந்திருக்கிறார்கள்.