Inneram.com

ஒரே பள்ளியில் படித்த பத்து மாணவர்கள் தற்கொலை செய்துக்கொண்ட சம்பவம் உ.பி.மாநிலம் நொய்டாவில் அதிர்ச்சியையும் பரபரப்பையும் ஏற்படுத்தி உள்ளது.

இந்திரபுரம் டிபிஎஸ் என்ற பள்ளியில் படித்து வந்தவர்கள் என்று வெளியாகியுள்ள செய்தி பள்ளி முதல்வர் மீதாராய் மறுத்துள்ளார். தேர்வு பயம் என்று காரணம் கூறப்பட்டாலும் காவல்துறையினர் மேலதிக விசாரணையில் ஈடுபட்டுள்ளனர்.

பீகாரில் புத்தா மிஷன் பல் மருத்துவக் கல்லூரி & மருத்துவமனை என்ற நிறுவனமொன்று பல்மருத்துவப் படிப்புக்காக விளம்பரம் செய்தது. அதில் தங்களது கல்லூரி மகத் பல்கலைக்கழக இணைப்பு பெற்றுள்ளதாகவும், இந்திய பல்மருத்துவக் குழுமம் (Indian Dental Council) அக்கல்லூரி படிப்புகளை அங்கிகரித்திருப்பதாகவும் கூறியிருந்தது. அதை நம்பி ஏராளமானவர்கள் அக்கல்லூரியில் சேர்ந்தனர்.

கல்லூரியினர் பொய்யான விளம்பரம் செய்து தங்களுக்கு பாதிப்பு ஏற்படுத்திவிட்டதாக பாதிக்கப்பட்ட 11 மாணவர்கள் உச்சநீதிமன்றத்தில் வழக்குத் தொடர்ந்தனர்.

மாணவர்களை கல்லூரிநிர்வாகம் ஏமாற்றியது நிரூபிக்கப்பட்டதால் அக்கல்லூரி நிர்வாகம் தலா இரண்டு இலட்சம் வீதம் 22 இலட்சம் அபராதம் வழங்க உச்சநீதிமன்ற நீதிபதிகள் உத்தரவிட்டனர். மேலும், மாணவர்களை கல்வியின் பெயரால் ஏமாற்றும் நிறுவனங்களுக்கு எதிராக நுகர்வோர் நலவழக்கு தொடுக்கலாம் என்றும் உச்சநீதிமன்றம் ஆலோசனை கூறியுள்ளது.

கொல்கத்தாவைச் சேர்ந்த ப்ரிதம் ரூஜ் கொல்கத்தாவின் பிரசிடெண்சி கல்லூரியில் கணிதவியல் பட்டப்படிப்பு படித்து வருகிறார். இரண்டாம் ஆண்டு தேர்வில் அவர் ஒரு பாடத்தில் 28 மதிப்பெண் மட்டுமே பெற்று தேர்வில் தவறியதாக முடிவு சொல்லப்பட்டது. இதனால் அவர் மறு கூட்டலுக்கு விண்ணப்பித்திருந்தார். அதன் பிறகு பல்கலைக்கழகம் அவர் 32 மதிப்பெண் பெற்று தேர்வு பெற்று விட்டதாக அறிவித்தது.

இதில் திருப்தி அடையாத அந்த மாணவர், விடைத்தாளை தான் பார்க்க அனுமதிக்க வேண்டும் என்று கோரி நீதிமன்றத்தில் வழக்குத் தொடர்ந்தார்.
இம்மனுவை விசாரித்த கொல்கத்தா உயர் நீதிமன்றம் " மாணவர்கள் தவறுகளைத் திருத்திக்கொண்டு தங்களை மேம்படுத்திக்கொள்வதற்காக திருத்தப்பட்ட விடைத்தாளை பார்ப்பதில் தவறில்லை" என்றும் இதற்காக, குறிப்பிட்ட காலம் ஒதுக்கப்படவேண்டும் என்றும் கூறியுள்ளது.