ஆப்கானிஸ்தானில் உள்ள அமெரிக்க மற்றும் நேட்டோ படையினருக்கு உணவு மற்றும் இராணுவ தளவாடங்கள் எடுத்துச் செல்லப்படும் பாகிஸ்தானின் கைபர் வழியை பாகிஸ்தான் தற்காலிகமாக மூடியுள்ளது. 70 சதவீதத்திற்கும் அதிகமான பொருள்கள் இந்த வழியாகவே அனுப்பப்பட்டு வந்தன.

கடந்த சில நாட்களாக நேட்டோ படையினருக்கு தளவாடங்கள் எடுத்துச் செல்லப்படும் வாகணங்கள் மீது தாலிபான் ஆதரவாளர்கள் தாக்குதல் நடத்தி அவற்றை எரித்தது. சில சமயங்களில் பொருள்களை ஏற்றிச் செல்லும் வாகனங்களைக் கடத்திச் சென்று விடுகின்றனர். கடந்த செப்டம்பர் மாதம் முதல் தாலிபான் ஆதரவளார்கள் இத்தகைய வாகனங்களைக் குறி வைத்து தாக்குதல் நடத்தி வருவது குறிப்பிடத் தக்கது.

செப்டம்பர் மாதம் அமெரிக்க கூட்டுப்படையினர் பாகிஸ்தான் எல்லையில் தாக்குதல் நடத்தியதைத் தொடர்ந்து சில நாட்கள் பாகிஸ்தான் இந்தப் பாதையை சில நாட்களுக்கு மூடி வைத்திருந்தது. வாகன ஓட்டுநர்கள் தங்களுக்குப் பாதுகாப்பு இல்லை என்று கூறி சில நாட்கள் அந்தப் பகுதி வழியே செல்வதைத் தவிர்த்தனர்.

கைபர் வழி அடைக்கப்பட்டதால் பொருள்கள் வருவதற்கு எந்தப் பாதிப்பும் இல்லை என நேட்டை படை அதிகாரிகள் கூறினர்.