ஹோலோகாஸ்டை மறுத்து வந்த இங்கிலாந்து பிஷப்பின் மன்னிப்பை வாட்டிகன் ஏற்க மறுத்துவிட்டது. தன்னுடைய கருத்தை அவர் மனப்பூர்வமாகவும் வெளிப்படையாகவும் திரும்பப் பெற வேண்டும் என்றும் வலியுறுத்தியுள்ளது.

தன்னுடைய கருத்து மற்றவர்களின் மனதை இந்த அளவு பாதிக்கும் என்பது எனக்குத் தெரிந்திருந்தால் என் கருத்தை நான் தெரிவித்திருக்க மாட்டேன் என்று இங்கிலாந்தைச் சார்ந்த பிஷப் ரிச்சர்டு வில்லியம்சன் தெரிவித்திருந்தார். 20 ஆண்டுகளுக்கு முன் தனக்குக் கிடைத்த ஆதாரங்களின் அடிப்படையில்தான் அவ்வாறு தெரிவித்ததாகவும் அவர் கூறினார்.

ஹோலோகாஸ்ட் பொய் என்பதை அவர் நம்புகிறாரா இல்லையா என்பதை இந்த பிஷப் தெளிவுபடுத்தவில்லை என்று யூதத்தலைவர்கள் கூறினர். பிஷப் ரிச்சர்டு உண்மையாகவே மன்னிப்புக் கேட்கவில்லை என்றும், பல பொருள்களைத் தரும் வார்த்தைகளை உபயோகித்து தந்திரத்தைக் கையாண்டுள்ளார் என்றும் யூதத் தலைவர்கள் கூறியுள்ளனர்.

வாட்டிகன் பிஷப் ரிச்சர்டுக்கு விதித்த நிபந்தனைகளை அவர் மதித்தது போல் தோன்றவில்லை என்று வாட்டிகன் செய்தித் தொடர்பாளர் பெடரிகோ லோம்பார்டி கூறினார்.